El Conseyu de Gobiernu autorizó un gastu de 15.821.106,25 euros, IVA incluyíu, pa contratar la obra de los accesos al nuevu Hospital Universitariu Central d’Asturies (HUCA) pola AS-II. Con esta decisión, el Gobiernu d’Asturies adelantra la finalización de les obres de conexón del HUCA doce meses. D’esta forma, nel añu 2016 va tar a disposición de los usuarios del hospital y de tolos ciudadanos l’actuación que completa la conexón del centru hospitalariu de referencia cola rede viaria rexonal, frente a la previsión primeramente fita, en 2017.
L’actuación va dexar ampliar les comunicaciones del centru sanitariu al traviés d’una vía d’accesu más directa y de mayor capacidá que va encurtiar considerablemente los tiempos y los percorríos. La nueva carretera va completar la ordenación urbana de la zona y va favorecer un meyor comportamientu del tráficu.
Les obres proxectaes consisten na habilitación de cuatro conexión. De primeres, ta prevista l’allongamientu del actual ramal de salida dende l’AS-II escontra la rotonda elevada de La Corredoria en sentido Uviéu-Xixón. De segundes, prevese la construcción d’una rotonda na zona de La Corredoria, sobre l’antigua carretera AS-266, que va distribuyir el tráficu urbanu y el d’entrada y salida del AS-II. A lo último, proxéctase la creación de dos exes de conexón, unu ente’l mentáu carril de salida del AS-II y la nueva rotonda de La Corredoria, y l’otru ente dicha glorieta y la rotonda elevada asitiada sobre l’AS-II.
El proyectu tamién inclúi l’analís d’otres actuaciones que pretenden integrar los nuevos accesos na so redolada, tantu dende’l puntu de vista medioambiental como de meyora d’espacios urbanos. D’esta forma, considérase l’allugamientu de pantalles antirruido qu’apanguen los niveles de contaminación acústica, según el plantíu d’arbolaos y llantadera de turries nuna superficie cimera a los 4.000 metros cuadraos.
La obra va salir a llicitación nos próximos díes y el plazu d’execución envaloráu ye de 24 meses.