La Conseyería d’Educación, Cultura y Deporte del Gobiernu del Principáu d’Asturies publicó la ufierta educativa non universitaria del Principáu d’Asturies na páxina web Educastur (www.educastur.es). La publicación, que se realiza al traviés d’esti mediu per segundu añu consecutivu, dexa llograr información sobre los centros sosteníos con fondos públicos y les enseñances que se van impartir mientres el cursu académicu 2014-2015. Los usuarios van poder movese pol documentu al traviés de hipervínculos, que faciliten l’accesu a la información deseyada.

Les persones comenenciudes van poder conocer los requisitos d’accesu a los estudios de la ESO, Bachilleratu y ciclos de la Formación Profesional; datos referentes al procesu d’escolarización y los tipos d’enseñances que s’imparten na nuesa comunidá autónoma, sacante la universitaria. Coles mesmes, la ferramienta cunta con un directoriu xeneral que recueye los datos de tolos centros.

El capítulu dedicáu a la Educación Primaria fai referencia a les novedaes incluyíes na Llei Orgánica pa la Meyora de la Calidá Educativa. Igualmente, esiste un apartáu dedicáu a la Formación Profesional Básica, de nueva implantación a resultes de l’aplicación del nuevu marcu lexislativu. Amás, inclúyense capítulos dedicaos a la Educación Infantil, la Educación Secundaria Obligatoria, el Bachilleratu, la Formación Profesional, les Enseñances Artístiques, les Enseñances d’Idiomes, les Enseñances Deportives y l’Educación de Persones Adultes. Tamién se reflexen los resolvimientos poles que se convoquen les pruebes llibres pal llogru directu de los títulos de Graduaos, Bachiller y Técnicos de Formación Profesional.