(EUROPA PRESS) Los diez mineros acusaos d’un delitu de desordes públicos mientres la güelga minera del 2012 (ún d’ellos tamién taba acusáu por atentáu con usu de mediu peligrosu) algamaron esti miércoles un acuerdu pol que se reducen les sos penes. Asina, fixáronse 6 meses nel casu de los nueve mineros pa los que la Fiscalía pidía 18 meses de cárcel; mientres que pal décimu, que s’enfrentaba a un pidimientu de cinco años de prisión, el fallu marca una pena d’añu y mediu.
Al respecto, el responsable de Minería de CCOO n’Asturies, Jaime Martínez Caliero, mostró’l so preste en declaraciones a los medios tres el fallu, cola confianza de que nengún entre en prisión.
«Entendemos qu’ésti ye’l meyor acuerdu posible», dixo, valorando’l «gran trabayu» realizáu polos servicios xurídicos del sindicatu. «Lo qu’esperamos ye qu’a nengún trabayador haya que condenalu por defender el so puestu de trabayu», añadió.
Asina, Jaime Martínez Caliero calcó en que «lo único que ficieron los trabayadores del sector de la minería ye defender les sos empreses, defender un sector, defender unes comarques Mineres».
Nel relatu de los fechos, la Fiscalía apuntaba que sobre les 07.00 hores del 2 de xunetu del 2012, los diez acusaos, xunto con otres persones a les que nun se pudo identificar formaron un grupu d’unes 60 y participaron nun corte de tráficu na carretera AS-I (Autovía Minera), al altor de Bendición (Siero).
El pidimientu inicial de la Fiscalía yera que se condenare a ún de los diez mineros a cinco años de prisión y a caún de los nueve restantes a un año y seis meses de cárcel. Además, solicitaba que los diez, de forma conxunta y solidaria, indemnizasen a la Conseyería de Fomentu con 2.155,27 euros polos gastos de reparación del pavimentu de la autovía, la valla y la retirada d’escombros.