El Gobiernu d’Asturies desactivó güei el protocolu para episodios de contaminación que permanecía activu, en nivel preventivu, n’Uviéu y les cuenques mineres al baxar ayeri los niveles de partícules PM 2,5 (de diámetru inferior a 2,5 micres) per debaxo del estragal de 25 en toles estaciones. Les cifres de PM10 resultaron igualmente baxes nos puntos de midida.
Asturies venía esperimentando dende’l 20 d’avientu una situación d’estabilidá atmosférica poco habitual, con ausencia d’agua y presencia d’inversiones a baxu altor, que motivó l’activación del protocolu’l 24 na zona d’Uviéu y el 26 en Llangréu. Esti problema nun afectó namá al Principáu, sinón que les condiciones de ventilación desfavorables tán dándose en casi toa España.
Según les midíes de la rede oficial, na área d’Uviéu algamáronse ayeri los 14 microgramos per metro cúbicu de PM 2,5 na estación de Llugones (Siero), 11 na estación del parque de Purificación Tomás y 16 nel Palaciu de los Deportes, cifres per debaxo del estragal de 25 previstu nel protocolu.
Tocantes a Llangréu, ayeri algamáronse valores de 21 microgramos per metro cúbicu de PM 2,5 tanto en Sama como en La Felguera. Por ello, y anque les condiciones d’estabilidá siguen y l’Axencia Estatal de Meteoroloxía preve condiciones de ventilación desiguales (favorable güei y mañana n’Uviéu y desfavorables en Llangréu), nun se cumple’l requisitu pa caltener l’activación del protocolu, polo que procede la so desactivación.
El protocolu autonómicu estrema trés niveles: 0 (preventivu), 1 (avisu) y 2 (alerta) y aplícase a trés contaminantes: les partícules en suspensión PM 10 (de diámetru inferior a 10 micres), PM 2,5 (diámetru inferior a 2,5 micres) y dióxidu de nitróxenu. A diferencia de lo qu’asocede n’otres comunidaes, esti postreru nun dio hasta agora problemes n’Asturies.
El nivel 0 del protocolu compromete a les alministraciones a realizar un siguimientu más refechu de la contaminación y a les empreses que desenvuelven actividaes potencialmente contaminantes a estremar el precuru. Nesti nivel, prohíbense les quemes de restos vexetales, pero nun s’establecen restricciones de tráficu, magar s’encamienta l’usu del tresporte públicu y compartir el vehículu priváu. Amás, los conceyos afectaos pueden adoptar les midíes que consideren fayadices p’amenorgar la polución, como por casu el riego de viales y carreteres o’l reforzamientu de la inspección.