La Conseyería de Salú intensificó la vixilancia nos cinco conceyos del Oriente n’alerta naranxa priorizando la protección de la población más vulnerable. Dende’l pasáu martes realizóse’l peneráu con PCR a 320 profesionales sociosanitarios d’ocho centros residenciales de mayores y de discapacidá, ensin que se detectaren enagora casos positivos. Esta campaña va estender hasta’l próximu martes n’otros trés dispositivos de la citada zona.
La situación d’alerta naranxa tien como finalidá alvertir que la evolución epidemiolóxica ye desfavorable y, por ello, resulta necesariu cumplir les midíes sanitaries vixentes nel nuesu territoriu y evitar midíes más drástiques como zarros perimetrales o confinamientos.
N’ese sentíu, l’Axencia de Seguridá Alimentaria, Sanidá Ambiental y Consumu empezó esti vienres les inspecciones específiques sobro les midíes de prevención de la covid-19 qu’afecten a 16 establecimientos d’alimentación y hostelería del Oriente rellacionaos con casos positivos.
El comité de siguimientu de la evolución epidemiolóxica foi informáu d’estes midíes na xunta del pasáu vienres. Amás, les autoridaes sanitaries piden a la población y visitantes de la zona qu’estremen les midíes de protección y prevención conocíes como les 3 M (llaváu de manos, metros de distancia y mázcaros), evitando les aglomeraciones y les situaciones de riesgu, polo que se pide un comportamientu exemplar y estricto de la normativa.
Dende’l pasáu 1 de xunetu, la área sanitaria VI, que correspuende al Oriente, rexistró 66 vecinos arimaos por coronavirus ensin cuntar colos visitantes que contraxeron la enfermedá mientres la so estancia vacacional na contorna. D’ellos, 60 moren nos cinco conceyos n’alerta naranxa.
Llanes ye’l conceyu con más afectación ente los sos habitantes, con 22 positivos, siguíu de Parres con 19 y Cabrales con 9. Ribesella y Cangues d’Onís tienen 5 casos cada unu a fecha de güei. Amás, el Serviciu de Vixilancia Epidemiolóxica identificó xuna media de cuatro contactos estrechos per cada andada en dicha zona.
Al respective de la evolución de la pandemia, el Serviciu de Vixilancia Epidemiolóxica confirmó 31 nuevos positivos correspondientes al día d’ayeri. Tolos afectaos presenten sintomatoloxía leve y permanecen aisllaos nes sos cases, sacante una persona que precisó ingresu hospitalariu.
El Serviciu de Vixilancia Epidemiolóxica sigue colos estudios de contactos pa establecer el venceyu epidemiolóxicu de toos ellos. La mayoría tienen relación con casos conocíos o con estancies fora d’Asturies.
Encamientos
La Conseyería de Salú encamienta a los ciudadanos consideraos contactos estrechos o que tán esperando la resultancia d’una prueba PCR a acutar la so vida social y guardar rigorosamente la cuarentena pa evitar la trasmisión del virus.
Amás, les autoridaes sanitaries recuerden que ye obligatoriu l’usu del mázcaru pa mayores de seis años nes víes públiques y espacios al campu, en cualquier espaciu zarráu d’usu públicu o que s’atope abiertu al públicu. Tamién ye preceptivu’l so usu nos medios de tresporte públicos y privaos, nesti últimu casu cuando los ocupantes nun convivan.
Amás, la llavadura frecuente de les manos y caltener una distancia interpersonal de, siquier, un metro y mediu con persones coles que nun se convive son otres de les midíes imprescindibles pa evitar les andaes.