(EUROPA PRESS) El secretariu d’Estáu d’Alministraciones Públiques, Antonio Beteta, aseguró esti vienres que contabilizar nel PIB actividaes illegales como la prostitución, les drogues o’l contrabandu nun tien por qué tornar nuna mayor aportación de los países miembros a los programes de la UE.
«El qu’haya un porcentaxe de PIB superior nun implica necesariamente, nin tanto, qu’haya aportaciones superiores a los programes de la Unión Europea per parte de los Estaos. Lo que sí supón ye apaecer ante’l conxuntu del mundu d’una manera más perfecta», señaló Beteta en declaraciones a Onda Cero recoyíes por Europa Press.
Y ye que, según resaltó Beteta, les actividaes illegales son una «realidá económica» qu’existe, pero que nun ta valorada. Agora, en función d’una normativa comunitaria d’obligáu cumplimientu, tolos países de la UE tendrán qu’estimar cuánto suponen estes actividaes pa les sos economíes.
«Non toes (les normatives comunitaries) son fáciles nin cencielles, nin tenemos la posibilidá de negamos. Lo que pretende Eurostat ye que se reflexe nes cuentes una realidá económica de manera estimativa y que tenga’l so reflexu na contabilidá de tolos países», esplicó.
Beteta señaló que l’Institutu Nacional d’Estadística (INE) yá ta trabayando nesta cuestión pa facer los cálculos y estimaciones qu’estes «realidaes económiques» suponen pal PIB español.