(EUROPA PRESS) El coordinador xeneral d’Izquierda Unida, Cayo Lara, defendió que «el ciudadanu Juan Carlos» tien que tar «suxetu a la xusticia» igual que «el restu de los ciudadanos», y sorrayó que «la inviolabilidá y «ser impune ante la llei ye una aberración». Coles mesmes, alvirtió de que la monarquía y el bipartidismu «nun son sinónimos d’igualdá nin de xusticia».
En declaraciones a Radio Euskadi, recoyíes por Europa Press, Lara reconoció, amás, que la so formación nun va asistir a la proclamación del nuevu monarca, ya calcó en que «el pactu de 1978 ta rotu», polo que «la Transición ta escosada».
En señalando que los representantes d’Izquierda Plural nun van asistir a la ceremonia de proclamación por «coherencia», recordó que la so formación reivindicó un referendu pa que’l pueblu español decida «nes urnes» qué forma d’Estáu desea.
«Decidir si quier monarquía o república que, pa nós, vien ser asemeyao a escoyer ente monarquía o democracia. Una coronación pol derechu de sangre ye contraria al sen más fondu de la democracia», denunció.
Nesti sen, manifestó que nun considera la so ausencia nel actu de proclamación una «falta de cortesía», daqué que, en tou casu, «tien la Cámara y la mesma Monarquía» cuando «nun se somete al veredictu del pueblu». «Si’l rei tien derechu a nun acudir, imaxine si tenemos derechos los que nun tamos d’acuerdu con un sistema monárquicu», añadió.
Tres calcar en que nun ye «entendible» que’l Parlamentu español pudiera aprobar esta selmana que «el fíu d’un señor tien que siguir siendo Xefe del Estáu porque se decidió hai 40 años», añadió que, cola ratificación de la Llei d’Abdicación, «el Congresu lo que fizo ye tener un divorciu bien fondu cola opinión pública».
«Les encuestes dicen que más d’un 60 por cientu de los ciudadanos del conxuntu del Estáu prefieren que se-yos consulte sobre la forma d’estáu. La democracia fonda tien qu’entamar na mesma cabeza del estáu. Si’l Xefe del Estáu tien inviolabilidá, eso nun ye exemplu pa un sistema democráticu», añadió.
Por too ello, manifestó que falar n’España d’igualdá «ye una ironía», mientres que queda «munchu camín» pa poder falar d’una «xusticia xusta» dempués de que «a la xusticia presionárasela dende la mesma Casa Real nel casu Urdangarin y nel casu qu’afecta tamién a la infanta».
«Queda muncho por faer y la monarquía, que apoyó’l bipartidismu, y el bipartidismu y la monarquía nun son sinónimos d’igualdá nin xusticia», espresó, p’añeair que’l caltenimientu de la inviolabilidá ye «una aberración del sistema».
Al so xuiciu, naide pue tener inviolabilidá y ser «impune ante la Llei», dao que «toos tenemos que ser iguales». Nesti contestu, recordó que tar aforáu, como nel casu de los diputaos, supón que te xulge’l Tribunal Supremu.
«Sicasí, el nuesu grupu parlamentariu namás quier tar aforáu pa la nuesa vida parlamentaria. Fuera d’ehí, n’actividaes delictives que podamos cometer, tenemos que ser iguales ante la Llei», señaló.
Coles mesmes, Lara defendió que «el ciudadanu Juan Carlos» tendría de tar «suxetu a los tribunales de xusticia, de la mesma manera que’l restu», daqué que tamién tendría que pasar nel casu de Felipe VI. «La inviolabilidá que va tener el futuru monarca paezme que ye una aberración antidemocrática», añadió.
«SENTAR NEL BANQUÍN»
Coles mesmes, defendió que «la forma d’un Estáu republicanu tien una fondura democrática que nun tien la monarquía». «Si tuviéramos un xefe de la república, ¿nun se sentaría nel banquín en dalgún momentu de la historia de la monarquía?», cuestionó.
A lo último, Lara alertó que’l bipartidismu formó parte del acompañamientu de la monarquía y amparáronse mutuamente «nun viendo lo que pasa n’España».
«El pactu de 1978 ta rotu, frayóse’l poder financiero, la banca y el bipartidismu. La Constitución viólase un día sí y al otru tamién. Esto ye lo que forma parte del sistema. La Transición ta escosada», remató.