El nuevu conveniu firmáu con Cruz Roxa supón la contratación temporal de 22 persones y el serviciu va empezar el próximu fin de selmana.
L’Alcalde de Carreño, Ángel Riego, y el presidente de la Xunta Local de Cruz Roxa en Candás, Gonzalo González, firmaron pa esti añu un conveniu de collaboración pa la prestación del serviciu de salvamentu y socorrismu en playes. Nel marcu d’ésti, el Conceyu carreñense concede a Cruz Roxa en Candás una subvención por importe de CIENTU SEIS MIL OCHOCIENTOS NOVENTA Y SEIS CON CUATRO € (106.896,04 €).
“Cruz Roxa ta dispuesta a collaborar col Conceyu na cobertura de playes, poniendo a disposición d’ésti la infraestructura y los recursos humanos necesarios pal desarrollu de l’actividá. Pa tal fin, soscribimos un conveniu, que va tener una vixencia añal a contar dende’l día de la so firma, quedando resueltu por finalización del tiempu pactáu, ensin necesidá de notificación nin requerimientu nengunu, a nun ser qu’enantes del so términu, dambes partes, de mutuu alcuerdu, y de forma espresa, lu enanchemos per otru periodu” – esplicó Ángel Riego, Alcalde de Carreño.
El serviciu va dase nes playes, feches y horarios que vienen darréu:
- La Playa Xibares: del 14 de xunu al 14 de setiembre de 2014, en cobertura d’a diario, de 11:30 a 19:30 hores.
- La Playa Carranques: del 14 de xunu al 14 de setiembre de 2014, en cobertura d’a diario, de 11:30 a 19:30 hores.
- La Playa Palmera: del 14 de xunu al 14 de setiembre de 2014, en cobertura d’a diario, de 11:30 a 19:30 hores.
- La Playa de Güelgues: del 14 de xunu al 14 de setiembre de 2014, en cobertura d’a diario, de 11:30 a 19:30 hores.
“El Conceyu, que tien la cesión del usu del 112 Asturies (Principáu d’Asturies) de la embarcación matrícula 8ª-GI-4-4-03, dexa la mesma, debidamente matriculada, documentada y asegurada, a Cruz Roxa pal so usu n’actividaes de vixilancia y salvamentu, mientres la vixencia del conveniu presente. Los gastos de combustible, mantenimientu y arreglu de les embarcaciones, mesmamente como’l material médico-sanitario pa los botiquinos, van ser costiaos directamente pol Conceyu” – añadió l’Alcalde.
Tol personal asignao a les actividaes asumíes por Cruz Roxa (1 Coordinador/a de playa dende’l 02 de xunu al 30 de setiembre de 2014, 2 Llancheros/es dende’l 11 de xunu al 15 de setiembre de 2014 y 19 socorristes dende’l 13 de xunu al 14 de setiembre de 2014), en virtú del Conveniu soscritu, fizo los cursos afayadizos de formación, teniendo de tar en posesión de los cursos de Primeros Auxilios, Socorrismu Acuáticu, Auxiliar de Tresporte Sanitario etc., según el tipu d’actividá a la que tean adscritos/es, y mesmamente aquelles otres titulaciones especifiques qu’esixa’l desempeñu de les xeres que-yos fueren encamentaes.
“Esti alcuerdu ye fiel reflexu d’una apuesta por un turismu calidable como correspuende a un conceyu como’l nuestru, dando un mayor serviciu nes nuestres playes: protexendo y vixilando’l bañu de les persones, tanto col trabayu de los socorristes nos distintos puestos, como’l voluntariáu de dicha entidá que faen campañes distintes de concienciación” – concluyó’l primer edil.