Los equipos directivos de los Servicios de Salú de Cantabria y Asturies axuntáronse nel Hospital Sierrallana pa establecer les llínees d’actuación que se recueyan nun alcuerdu de collaboración asistencial ente dambes comunidaes autónomes.
Pa ello hanse evaluáu les carteres de servicios esistentes en dambos Servicios de Salú y nos sos centros hospitalarios de referencia: l’Hospital Universitariu Marqués de Valdecilla y l’Hospital Universitariu Central d’Asturies (HUCA).
L’oxetivu d’esti alcuerdu de collaboración ye ameyorar la calidá de l’atención sanitaria, evitando duplicidades de servicios asistenciales en dambes comunidaes autónomes, llogrando una mayor eficiencia de los recursos y asegurando a los pacientes un meyor accesu a l’atención de determinaes patoloxíes y técniques, tantu quirúrxiques como de diagnósticu.
Como esplicó’l director xerente del Serviciu Cántabru de Salú, Julián Pérez, los recursos sanitarios «nun son ilimitaos» y trátase de buscar un modelu de xestión qu’ufierte les soluciones más eficaces p’atender y dar respuesta a una presión asistencial cada vez más creciente, garantizando en tou momentu a la población una atención sanitaria calidable.
Sorrayó qu’esti oxetivu d’ameyorar l’atención sanitaria va realizase sobre la base de los principios de solidaridá, universalidá y equidad» qu’inspiren el Sistema Nacional de Salú y que sirven de base al modelu sanitariu de Cantabria y del Principáu d’Asturies.
Amás del director xerente del SCS, na xunta tamién tuvieron presentes el director xerente del Serviciu de Salú del Principáu d’Asturies (SESPA), José Ramón Riera; la subdireutora d’Asistencia Sanitaria del SCS, Ana Tejerina; la directora d’Atención y Evaluación Sanitaria del SESPA, Victoria Xátiva y la subgerente de Valdecilla, Beatriz López.
Esti alcuerdu, que va ser precisu desenvolver en xuntes posteriores, preve la posibilidá d’ufiertar a los pacientes de la otra comunidá autónoma aquellos servicios y recursos que redunden nuna atención sanitaria de más calidá y segura pa los pacientes.
ATENCIÓN SANITARIA ZONES ESTREMERES Y EMERXENCIES
Los responsables del SCS y del SESPA tamién trataron les llínees de collaboración qu’establezan l’atención sanitaria nes zones estremeres ente dambes comunidaes autónomes.
Esta concrétase en que, en casu d’urxencies y emerxencies nos que la rapidez del treslláu al hospital sía determinante, como pue ser el casu d’un ictus o un infartu, los vecinos de dambes comunidaes autónomes puedan ser atendíos nel hospital al que s’apuerte con mayor rapidez, con independencia del so llugar de residencia.
Tamién se preve que’l siguimientu d’estos casos facer dende l’hospital nel que fueron atendíos, si asina lu prefieren los afectaos. Y que determinaes especialidaes médiques puedan ser atendíes por especialistes de la otra comunidá autónoma.
Esti cambéu pretende ameyorar la calidá y l’accesibilidá de l’asistencia sobremanera a los vecinos de la localidá cántabra de Tresviso y de les localidaes asturianes de Peñamellera Alta, Peñamellera Baxa y Rivadeva.
