(EUROPA PRESS) Asturies rexistró 152 execuciones hipotecaries entamaes sobre viviendes nel primer trimestre de 2014, la sesta cifra más baxa por comunidaes, per delantre de País Vascu (122), Navarra (102), La Rioxa (37), Ceuta (13) y Melilla (3), según la nueva estadística d’execuciones hipotecaries publicada esti llunes pol Institutu Nacional d’Estadística (INE).
Atendiendo a les execuciones hipotecaries de viviendes, el 0,09 por cientu de les hipoteques constituyíes n’Asturies sobre viviendes nel periodu 2003-2013 entamaron una execución hipotecaria nel primer trimestre del 2014. Asina, Asturies queda como la tercer comunidá con valores más baxos, por detrás de País Vascu (0,05 por cientu) y La Rioxa (0,04 per cientu). Otra manera, Canaries (0,35 por cientu), Castiella-La Mancha (0,31 por cientu) y la rexón de Murcia (0,27 por cientu), rexistraron les mayores tases por comunidaes, penriba de la media nacional del 0,21 por cientu.
Per otru llau, Asturies rexistró 378 execuciones hipotecaries entamaes sobre’l total de finques, penriba de Cantabria (261), Navarra (204), País Vascu (224), La Rioxa (144), Ceuta (46) y Melilla (3).
Asina, tomando como referencia les hipoteques constituyíes nel periodu 2003-2013 sobre’l total de finques, el 0,15 por cientu de les hipoteques constituyíes n’Asturies entamaron una execución hipotecaria nel primer trimestre del 2014, perbaxo de la media nacional del 0,25 per cientu.
En concreto, de les execuciones hipotecaries entamaes sobre’l total de finques, 80 lo fueron sobre finques rústiques y el restu hasta 378 sobre finques urbanes, correspondiendo 152 a viviendes, 30 solares y 116 otres urbanes.
Nel conxuntu del país, el númberu d’execuciones hipotecaries sobre viviendes habituales quedó en 9.464 nel primer trimestre del añu, cifra un 19,1% superior a la del trimestre anterior, pero un 4,2% inferior a la del periodu xineru-marzu de 2013.
L’oxetivu principal d’esta estadística ye ofrecer trimestralmente’l númberu de certificaciones d’execuciones hipotecaries entamaes ya inscrites nos Rexistros de la Propiedá mientres el trimestre de referencia. Estadística recuerda que non toles execuciones d’hipoteca acaben col llanzamientu (desahuciu) de los sos propietarios.
Ente xineru y marzu d’esti añu entamáron 32.565 execuciones hipotecaries, un 10,4% más que nel cuartu trimestre del añu pasáu y un 19,5% más que nel primer trimestre del 2013. D’eses 32.565 execuciones hipotecaries contabilizaes hasta marzu, 18.971 correspondieron a viviendes, con una crecimientu intertrimestral del 11,4% y una subida añal del 8%.