La Conseyería d’Educación y Cultura preve enllantar l’Asturianada nos conservatorios profesionales de música del Principáu, tres la publicación per parte del Ministeriu d’Educación y Cultura, el 22 de marzu, del decretu que crea la especialidá, lo que va dexar que pueda impartise como enseñanza profesional y reglada.
El Principáu trabaya nel desenvolvimientu de la especialidá para la so futura puesta en marcha, en collaboración coles direcciones de los conservatorios profesionales de Xixón y Uviéu y un conxuntu d’especialistes. Nesti sentíu, en curtiu va publicar nel Portal de Tresparencia’l proyectu de decretu en trámite de consulta pública.
L’Asturianada foi declarada bien d’interés cultural de calter inmaterial pol so raigañu tradicional, el so interés etnográficu, la complexidá del so repertoriu, el so valor históricu na cultura musical europea y el so pesu nel panorama musical de la comunidá. Agora va convertise tamién n’especialidá musical y va llograr un buecu na ufierta formativa de los conservatorios profesionales de música, onde va atopar l’espaciu necesariu para la enseñanza, l’estudiu, la investigación, la protección y, arriendes d’ello, la preservación y espardimientu del cantar autóctono asturianu por excelencia. Amás, va dexar formar a presentes y futures xeneraciones na so práctica, la so estética y los valores tradicionales.
D’esta miente, y xuntu cola especialidá de Gaita, complétase la presencia de la música tradicional asturiana nos conservatorios y garantízase la cualificación de los futuros profesionales en dambes disciplines.