(EUROPA PRESS) Los responsables d’Educación d’Andalucía, Canaries y Asturies, esixeron esti vienres al ministru d’Educación, José Ignacio Wert, que convoque una Conferencia Sectorial de la materia pa concretar la financiación d’aspectos contemplaos na Llei Orgánica pa la Meyora de la Calidá Educativa (Lomce), como la Formación Profesional Básica dao que, según aseguraron, les comunidaes nun saben cómo van financiase estos estudios.
Nuna rueda prensa conxunta en Madrid, el conseyeru d’Educación, Cultura y Deporte de la Xunta d’Andalucía, Luciano Alonso, y los sos homólogos nes comunidaes autónomes d’Asturies, Ana González, y Canaries, José Miguel Pérez, denunciaron que’l Ministeriu pretende qu’en septiembre del 2014 la FP Básica tea en marcha sin saber qué costu económico tienen esos estudios.
Asina, la conseyera asturiana llamentó que les comunidaes nun sepan cuántu dineru van disponer pa estos estudios y censuró que’l Gobiernu diga que pa los mesmos contáronse con 1.700 millones d’euros procedentes del Fondu Social Européu cuando esti fondu «nun copaga gastos estructurales como son éstos». «Nel 2017 podríamos alcontrámonos con que Bruxeles exíxemos la devolución d’esi dineru», alvirtió.
«Si’l Ministeriu impón nueves cargues va tener qu’asumir tamién la so financiación, queremos que nun mos engañen y saber si tien consolidaes eses cantidaes o si son préstamos a devolver poles comunidaes autónomes», reclamaron.
Nesa llinia, caltuvieron qu’a estes altures nun puen dici-yos a les families de los estudiantes cómo se va a pagar la que, amás, ye «una de les piedres angulares del Gobiernu central pa espulsar a parte del alumnáu que se considera cafiante», según señaló la conseyera asturiana. «Ye un viaxe a nenguna parte», añadió l’andaluz.