La Conseyería d’Empléu, Industria y Turismu va convocar mañana, llunes, al traviés de la Sociedá Pública de Xestión y Promoción Turística y Cultural del Principáu, l’I Concursu de Fotografía Asturies Paraísu Natural coles mires de reflexar los principales valores y recursos d’Asturies como destín turísticu y ufiertar nueves miraes sobre’l so patrimoniu natural y cultural.
En total, van concedese 8.000 euros en premios pa les fotografíes presentaes nos sos dos categoríes: Naturaleza y Paisaxe, y Patrimoniu Históricu, Artísticu y Cultural. Dambes van cuntar con un primer premiu de 1.600 euros y un segundu de 800. Amás, va haber ocho accésits de 200 euros pa cada categoría.
El xuráu que va valorar les obres presentaes va tener en cuenta la vinculación de les imaxes a les temátiques del concursu, la calidá técnico y artístico de la propuesta y la capacidá de comunicación visual, según la so singularidá.
El plazu pa la presentación de los trabayos va estender hasta’l 7 de noviembre. Les fotografíes que resulten premiaes van formar parte d’una esposición que va percorrer les principales localidaes del Principáu.
Nes próximes selmanes, tamién al traviés de www.turismoasturias.es, va convocase un concursu en Instagram centráu n’imaxes serondiegues, col propósitu de potenciar la presencia d’Asturies como destín turísticu nesta rede social.
