Los ganaderos asturianos que quieran acoyese al amenorgamientu incentiváu de la producción láctea pueden faelo dende güei, al traviés de les oficines comarcales y de les organizaciones agraries, según informó la conseyera de Mediu Rural y Recursos Naturales, María Jesús Álvarez mientres la xunta que caltuvo esta tarde n’Uviéu colos integrantes de la mesa del sector.
Álvarez convocó esti órganu, nel que tán representaos tolos eslabones de la cadena, pa informar de les nueves midíes adoptaes pa intentar frenar la crisis de la lleche, y de les que’l pasáu xueves el Ministeriu d’Agricultura informó a toles comunidaes.
Los ganaderos que s’acueyan al amenorgamientu voluntariu de la producción van percibir 14 céntimos per quilu de lleche. Sicasí, el Gobiernu d’Asturies considera qu’esta midida nun tendría de plantegar se de forma homoxénea en tolos estaos de la Unión Europea (UE), una y bones el saldu de cada país ye distintu: España ye deficitaria en lleche, ente qu’hai naciones con una producción mayor que contribuyeron a xenerar el problema. Sicasí, el Principáu tien la obligación de poner los medios necesarios pa el productores que consideren fayadizu acoyese a esta midida.
La conseyera informó tamién a los integrantes de la mesa de qu’el so departamentu trabayó tol branu col restu de les comunidaes autónomes y, particularmente, coles de la cornisa Cantábrica, pa defender una postura común na repartida de los 14,6 millones d’euros n’ayudes complementaries a los ganaderos que la UE va destinar a España, de tala forma que la so distribución beneficie a los ganaderos asturianos.
Álvarez aseguró que’l Gobiernu d’Asturies ta defendiendo yá ante’l ministeriu’l sofitu a les pequenes esplotaciones, a l’actividá ganadera en zones de monte y a les cooperatives. “Queremos qu’estos fondos sofiten a los ganaderos asturianos y ayuden a consolidar les sos esplotaciones, sobremanera les que tienen futuru, porque estes midíes tán destinaes a ayudar a el productores a pasar esta fonda crisis”, aseguró.
Según esplicó, l’Executivu autonómicu yá punxo en marcha les sos propies iniciatives, ente elles, la convocatoria de les ayudes a la modernización ya incorporación de moces, con una cuantía de 26,6 millones en cuatro año. Amás, los ganaderos que precisen refinanciar la so delda colos bancos yá pueden faelo tres l’alcuerdu suscritu ente la conseyería, el ministeriu, Saeca, Asturgar y les entidaes financieres.
Crítiques de COAG
Per otra parte, la titular de Desenvolvimientu Rural manifestó que les crítiques arramaes güei pola secretaria xeneral de COAG, Mercedes Cruzáu, respectu al supuestu retrasu de la conseyería n’informar sobre les midíes de la UE “son sorprendentes y tán totalmente fuera de sitiu”. Nesti sentíu, recordó que les comunidaes autónomes recibieron la información del ministeriu’l pasáu xueves, día 8 de setiembre, el mesmu día que la Comisión Europea aprobó los siete reglamentos que se publicar el vienres nel Boletín Oficial de la Comunidá Europea.
“Güei, llunes, axuntemos yá a la Mesa del Sector Lácteo, nun hubo tiempu nin posibilidá dalguna de ser más axiloses”, sorrayó
