El director xeneral de Política Llingüística y Normalización, Fernando Padilla, presentó güei la final del IX Premiu al Meyor Cantar, gallardón convocáu pol Gobiernu del Principáu d’Asturies coles mires de consolidar, prestixar y arriquecer la creación musical asturiana, y que premia’l meyor cantar en llingua asturiana o en gallego-asturianu.
Fernando Padilla, que tuvo acompañáu pol alcalde de Siero, Ángel García, y por Marta Mori de Arriba, miembru del xuráu, destacó que’l Premiu yá se convirtió nun referente pa los creadores asturianos y anunció que la gala de la final d’anguaño va celebrase’l vienres 30 de setiembre a les 20:00 hores nel Auditoriu Municipal de la villa polesa.
Los cinco finalistes qu’opten al IX Premiu al Meyor Cantar, anunció Padilla, son los músicos Anabel Santiago y Fernando Valle Roso y los grupos Bacotexo, La Tarrancha y Vrienden. A la edición d’anguaño podíen optar aquellos temes orixinales n’asturianu o en gallego-asturianu editaos nel 2014 y el 2015, pola mor del paréntesis abiertu l’añu pasáu na convocatoria del premiu.
Na gala del 30 de setiembre, depués de ver l’actuación de los cinco candidatos, el xuráu que los escoyó como finalistes, formáu por especialistes en música y llingua asturiana, va escoyer tamién el cantar ganador. Na celebración, la Banda de Gaitas El Trasno, ganadora de la última edición col tema «Volviche», va dar un conciertu.
Los artistes qu’opten al gallardón y la obra cola que compiten son estos:
Anabel Santiago, con «La lloca» (lletra: Xulio Arbesú)
Anabel Santiago participa col tema La lloca, con lletra de Xulio Arbesú. Nos sos venti años de trayectoria, l’artista recibió, ente otros munches reconocencies y gallardones, el Premiu Nacional de la Música al meyor cantar en llingua asturiana pol tema Agora (2010), o los premios AMAS a meyor cantar folk, meyor discu folk y meyor voz.
Bacotexo, con «Teatro valleiro» (lletra: Ricardo Saavedra)
La banda de rock Bacotexo presenta’l tema Teatro valleiro, con lletra en gallego-asturianu de Ricardo Saavedra, baxista del grupu. La banda foi finalista dos veces nel Premiu al Meyor Cantar (2009 y 2012) y semifinalista del FestiAmas (2013 y 2014), amás d’actuar na última edición del Día de les Lletres Asturianes nel Teatru Campoamor.
Fernando Valle Roso, con «A mano izquierda del mundu» (lletra: Ismael Arias)
Fernando Valle Roso presenta al Premiu’l cantar A mano izquierda del mundu, con lletra d’Ismael Arias. Ganador d’importantes premios nos principales concursos de tonada, tamién cantó a dúu cola so hermana Marisa Valle Roso.
La Tarrancha, con «Tuntu» (lletra: Delfín Valdés)
La Tarrancha propón el tema Tuntu, con lletra del so cantante, Delfín Valdés. Amás de publicar en formatu de cedé, comparten tola so obra al traviés d’Internet.
Vrienden, con «Avérate» (lletra: Juan Ramón Duarte Fernández-Mijares)
Finalistes del Premiu al Meyor Cantar na última edición, Vrienden vuelve participar na final col tema Avérate. La lletra ye de Juan Duarte, voz del grupu y tamién guitarra acústica. Llograron el Premiu AMAS a meyor discu Folk con Vrienden, nel 2013, y el IX Folkez Blai, n’Ermua (Vizcaya).