La Conseyería de Sanidá punxo en marcha nel añu 2011 un programa de detección y comunicación de barruntu de cáncer profesional n’Asturies que dexó estudiar 566 trabayadores diagnosticaos de cáncer en situación de baxa llaboral. Tres la valoración de la hestoria llaboral de los casos, atopáronse 27 con altes probabilidaes de ser clasificaos como enfermedá profesional (5% del total); y n’otros 65 casos (11,5%) acreditóse una relación clara anque menos intensa ente la enfermedá y l’ambiente llaboral. Nel 83,4 per cientu restante de los casos (474 casos) el cáncer considérase una enfermedá común.
El programa, pioneru n’España, va ser l’asuntu principal de la xornada técnica sobre’l cáncer llaboral ‘Una xera de toos. Reconocencia del cáncer llaboral’ que se va celebrar mañana nel Salón d’Actos de la Conseyería de Facienda y na que participen la Conseyería de Sanidá, el Serviciu Públicu de Salú del Principáu d’Asturies, l’Institutu Asturianu de Prevención de Riesgos Llaborales y l’Institutu Nacional de la Seguridá Social.
Esta xornada, que va ser inaugurada pol Conseyeru de Sanidá, Faustino Blanco, ta dirixida a profesionales del Serviciu Público de Salú, Inspección Médica, Institutu Nacional de la Seguridá Social, Servicios de Prevención, Mutues d’Accidentes de Trabayu y Enfermedaes Profesionales y Organizaciones Sindicales y Empresariales y colla preténdese dar a conocer les actividaes del programa y sobremanera les resultancies alcanzaes tres tres año y mediu de siguimientu.
El cáncer ye una de les causes d’enfermedá que más afecta a la población pola so incidencia y la so gravedá. La Organización Mundial de la Salú considera qu’un 19% de los cánceres que se detecten son debíos a factores ambientales y llaborales. Sicasí, pa los médicos del sistema públicu de salú supon una seria dificultá determinar l’orixe llaboral de la enfermedá neoplásica una y bones les sos causes son múltiples y non siempres bien conocíes.
Una d’estes dificultaes ye’l tiempu que media ente l’entamu de la esposición a los axentes causantes y el diagnósticu de la enfermedá. En munchos casos trescurrió abondu tiempu, inclusive décades, como para nun abarruntar d’una relación causal y nel casu de faelo, como para nun atopar pruebes concluyentes de que realmente esistió la esposición.
En 2011 la Conferencia internacional sobre determinantes ambientales y llaborales del cáncer: intervenciones pa la prevención primaria”, celebrada n’Asturies, encamentó a los gobiernos a fomentar la prevención primaria na esposición de la población mundial a los factores causantes del cáncer
Ente les causes conocíes del cáncer hai munches sustances químiques y axentes físicos y biolóxicos presentes nos llugares de trabayu. L’Axencia Internacional d’Investigación del Cáncer (IARC) identificó hasta agora siquier 110 sustances y circunstancies d’esposición (oficios, procedimientos de trabayu) que clasificó nel grupu I (canceríxenu) y nel grupu 2A (probablemente canceríxenu).
Con esta perspectiva, la Dirección Xeneral de Salú Pública del Gobiernu del Principáu d’Asturies punxo en marcha en 2011 un programa pa detectar casos de cáncer profesional al traviés de los médicos d’atención primaria y ponelo en conocencia del INSS por que dea en la valoración de la continxencia.
Los sos oxetivos fundamentales son facilitar la comunicación de barruntu de cánceres profesionales según lo establecío nel Real Decreto 1299/2006., ayudar a la reconocencia de cánceres profesionales per parte del Sistema de Seguridá Social, ameyorar el sistema de vixilancia epidemiolóxica d’enfermedaes rellacionaes col trabayu n’Asturies y aumentar la conocencia y avanzar na investigación sobre la relación ente esposiciones llaborales y desenvolvimientu del cáncer n’Asturies.
El programa ta dirixíu a toles persones atendíes pol Serviciu de Salú del Principáu d’Asturies n’atención primaria d’edá igual o superior a 18 años y les principales fontes d’información qu’utiliza son el barruntu del médicu y les baxes emitíes polos médicu d’atención primaria,. Los posibles casos son detectaos pol Serviciu d’Inspección Sanitaria de la Conseyería de Sanidá al traviés de les sos inspecciones d’área por aciu un sistema d’alerta na aplicación informática SagITario, que sirve pa xestionar los procesos d’incapacidá temporal (IT) por enfermedá común y accidente non llaboral.