(EUROPA PRESS)El titular del Xulgáu d’Instrucción númberu 3 de Palma, José Castro, encamentó al fiscal anticorrupción Pedro Horrach a interponer «una querella por prevaricación» si «cree lo qu’escribe» nel recursu que presentó contra l’autu pol que’l maxistráu punxo fin a la instrucción del casu Nóos.
Asina lo punxo de manifiestu esti vienres ante los medios a la so llegada a los Xulgaos de Vía Alemaña, onde, preguntáu pol escritu de Horrach, Castro recalcó que nél hai «clares imputaciones de que prevariqué». Tal como sorrayó, trátase de «espresiones de descreitu que si se meyoraren, el recursu nun perdiera contundencia».
Per mediu d’un duru recursu de 63 páxines, el fiscal reprocha a Castro llevar a cabu una instrucción «a la carta» y practicar investigaciones «contradictories» sobre la Infanta Cristina.
Coles mesmes, critica que’l maxistráu ficiera sobre la hermana del rei Felipe VI «un xuiciu de valor basáu en simples especulaciones: Cristina de Borbón ye culpable, nun se sabe bien de qué, pa de siguío entamar una intensa prospección pa ver si se la pilla nun renunciu».
«Cuando’l puertu de destín ta determináu antes d’entamar la investigación, basáu en simples especulaciones, contamina de tal forma la marcha esploratoria que la torna nun itinerariu inamovible, nel que los parámetros d’imparcialidá, oxetividá y congruencia que tienen que presidir cualquier actuación xudicial queden apostraos», sorraya tayante Horrach, ente otres numberoses consideraciones y crítiques hacia’l xuez.
