(EUROPA PRESS) La vocera nacional d’Unión, Progresu y Democracia (UPyD), Rosa Díez, considera «ficticia» la polémica que se montó sobre los fondos de pensiones que’l Parlamentu Européu xestionaba al traviés d’una Sicav que, según remarcó, yeren «llegales dafechu».
En rueda prensa nel Congresu, Díez, europarlamentaria de 1999 al 2007, esplicó que l’escándalu tien el so orixe en que n’España «demonizáronse» les SICAV porque s’utilizaron «como un instrumentu de fraude fiscal» y pol «desconocimientu» de cómo funcionen esti tipu de sociedaes.
«Les SICAV nun son fraudulentes, sinón l’usu fraudulentu que se faiga d’elles», pero ési «nun ye’l casu» de los fondos de pensiones voluntarios que’l Parlamentu européu ofrecía a los sos parlamentarios, señaló la líder maxenta, que soscribió un fondu de pensiones mientres unos años porque tenía «derechu» a invertir el so dineru no que considerara conveniente. «Tamién tengo un fondu de pensiones na BBK», comentó.
PODRÁ COBRAR EL PRÓXIMU AÑU
La líder d’UPyD almitió qu’ella desconocía que’l dineru qu’entregó mientres dellos años de la so estancia en Bruxeles nesi fondu de pensiones xestionábase al traviés d’una Sicav, pero apuntó que nun lo esclara pa «disculpase» porque, según insistió, «nun ye daqué irregular».
Nesti puntu, preguntada poles declaraciones realizaes pol exeurodiputáu de CiU ente’l 2’04 y 2009, Ignasi Guardans, qu’afirmó que «cualquier con un mínimu de responsabilidá sabía que’l fondu xestionábalu una SICAV», la diputada vasca retrucó qu’igual ye qu’ella ye «tonta».
Rosa Díez esplicó que nengún de los eurodiputaos españoles ‘beneficiarios’ d’esi fondu de pensiones européu tien por qué incluyilu na so declaración de la renta –anque sí na declaración de bienes ante’l Congresu– porque nun perciben nada del dineru entregáu hasta que llega la xubilación.
Ye entós, prosiguió la líder de la formación, cuando caún d’ellos va tener que pagar los correspondientes impuestos nel so país d’orixe. Nel so casu, l’añu qu’entra, cuando cumple 63 años, momentu nel que, nel so casu, va tributar en función d’unos 400 euros al mes.
UNA COTIZACIÓN DIFERIDA
Preguntada nesti puntu por qué si too ye llegal el cabezaleru de llista d’Izquierda Unida (IX), Willy Meyer, renunció al so escañu de diputáu n’almitiendo tener un fondu de pensiones européu al traviés d’una Sicav, Díez respondió que considera qu’hubo una «polémica ficticia» sobre esti asuntu porque «nun hai fraude nin posibilidá de fraude». «Trátase –resumió– d’una cotización diferida».
Díez esplicó que por cada dos euros qu’ingresa’l diputáu nesi fondu, la Eurocámara pon ún, pa dexar claro que pue entender que’l ciudadanu critique tener que pagar del so bolsu un terciu d’esi dineru. «Van dicir qu’abondo cobren yá», indicó.
