(EUROPA PRESS) El presidente del Gobiernu, Mariano Rajoy, defendió esti xueves en Malabo los Derechos Humanos y destacó que la democracia ye, xunto cola paz y la seguridá y a l’abertura económica, la vía pa llograr la construcción de sociedaes prósperes.
Nel so discursu ante’l Conceyu de la Unión Africana, Rajoy calcó en que’l futuru de cada nación «han decidilo los que tán llamaos a construyila col so trabayu» y qu’instituciones sólides, tresparentes y abiertes a los ciudadanos producen sociedaes nes que les desigualdaes mengüen y l’increíble potencial del ser humanu pue espandise sin llendes».
La democracia, calcó, ye un proyectu compartíu al que puen contribuyir tolos ciudadanos independientemente de la so raza, sexu, ideoloxía o relixón, y con «plenu respetu de los Derechos Humanos». Eso sí, de primeres dixo qu’hai «munchos caminos» hacia la prosperidá y la inclusión, asina que «cada país ha siguir el so propiu camín y naide ha dar llecciones a naide».
El xefe l’Executivu tamién dixo que la combinación de paz, democracia y «abertura económica» ye lo que permitió a África siguir «creciendo con fuerza» mientres la crisis «golpia con fuerza al restu del mundu».
Amás, refirióse a la mocedá africana, afirmando que, pese a que’l continente ye ricu en recursos naturales, «el so principal recursu son les persones», dao que ye’l continente cola población más nueva nun mundu qu’avieya.
