(EUROPA PRESS) El personal sanitario de Pediatría del nuevu Hospital Universitariu Central d’Asturies (HUCA) publicó esti xueves una carta na qu’espliquen los motivos del so descontentu cola xestión del treslláu a les instalaciones de La Cadellada y les «disfunciones» que sigue causando na asistencia.
«Tampoco queremos cayer nel alarmismu, pues nun hubo incidentes que llamentar, pero sigue habiendo problemes», manifestaron al traviés d’una nota prensa.
L’escritu ta firmáu por 17 médicos axuntos, 18 residentes y ocho enfermeres del Área de Xestión Clínica de Pediatría. Nél señalen que los «enguedeyos» siguen existiendo na práctica asistencial tres dos selmanes de rodaxe. Añaden que les urxencies de Pediatría, igual que les d’adultos, son «un ‘cuello de botella'».
Otros problemes son que «l’aplicación de la historia clínica pierde datos y nun permite imprimir informes d’altes», que dellos tratamientos crónicos «tán en riesgu de suspensión» por falta de respuesta analítica o qu’haya ordenadores que sigan sobre caxes sin desembalar. A ello suman que «la frustración del usuariu recái en primer términu sobre’l personal sanitario, elevando l’estrés».
A xuiciu d’estos profesionales sanitarios los responsables del treslláu del vieyu al nuevu HUCA nun escucharon les sos alvertencies y persistieron na decisión de «efectuar el treslláu baxo criteriu temporal y a costu cero».