(EUROPA PRESS) El secretariu xeneral del PSOE, Alfredo Pérez Rubalcaba, anunció esti xueves que va dexar el so escañu nel Congresu de los Diputaos el próximu mes de setiembre y volverá dar clases a la Universidá.
Según esplicó nuna comparecencia ante los periodistes na Cámara Baxa, escoyó esti momentu p’anuncialo porque ye l’últimu Plenu ordinariu que se celebra nesti periodu de sesiones. Va siguir como presidente del Grupu Socialista hasta que’l PSOE tenga una nueva dirección, de manera que si convoquen plenos estraordinarios, va acudir.
Rubalcaba aseguró que la so decisión yá la conocía «muncha xente», anque hasta agora nun desvelara qué lo fairía dempués de dexar la Secretaría Xeneral del PSOE. Un día dempués de la derrota nes elecciones europees, Rubalcaba anunció la so dimisión y la convocatoria d’un congresu estraordinariu pa escoyer al so sucesor.
Güei desveló a qué va dedicase: «en septiembre voi dexar el mio escañu y voi volver a la mio universidá», dixo. En concreto, va impartir clases de Química Orgánica na Universidá Complutense de Madrid, según esplicó a los periodistes, colos que bromió pidiéndo-yos que nun acudan al so primer día nes aules.
«EL MAYOR HONOR D’UN POLÍTICU, SER DIPUTÁU»
Rubalcaba aprovechó pa sorrayar que foi un honor» ser diputáu del Congresu mientres estos años. «El mayor honor que pue tener un políticu ye ser diputáu, nun hai otru puestu más relevante, más importante y más gratificante, y poro fueron 21 años d’un honor a los que pongo fin agora», afirmó.
Amás, aprovechó pa despidise en públicu de los periodistes: «Munchos lleváis, nun sé si tantos años, pero munchos años conmigo, lo único que deseo ye que m’echéis tanto de menos como yo a vosotros».
Rubalcaba llegó a la Cámara Baxa en 1993 y dende entós formó parte de toles llexislatures. Amás, foi ministru d’Educación y Ciencia (ente 1992 y 1993), ministru de la Presidencia (de 1993 a 1996), voceru del Grupu Parlamentariu Socialista (de marzu del 2004 a abril del 2006), vicepresidente primeru del Gobiernu y voceru (nel 2011) y ministru del Interior (ente’l 2006 y el 2011).
Ta al mandu de la Secretaría Xeneral del PSOE dende febreru del 2012, cuando s’impunxo a la exministra Carme Chacón nel congresu de Sevilla. El pasáu 26 de mayu anunció la so dimisión, asumiendo la responsabilidá pola derrota electoral y convocando un cónclave estraordinariu pa escoyer al próximu cabezaleru de los socialistes.
