(EUROPA PRESS) Izquierda Unida d’Asturies va escoyer a los sos candidatos electorales en primaries, anque tovía nun ta claro si van ser abiertes a los simpatizantes o reservaes pa los afiliaos. El coordinador xeneral tamién lu escoyerá directamente la militancia.
Son los primeros resultaos que se conocen del referendu que la organización celebró esti miércoles pa tomar una decisión al respecto d’estos asuntos, y nel que tomó parte más d’un 60% de los cerca de 3.000 militantes colos que cuenta esta fuerza política n’Asturies. El so coordinador xeneral, Manuel González Orviz, diólos a conocer esti xueves nuna rueda prensa pa presentar un actu solidariu col pueblu palestín.
Orviz tovía nun cuenta con resultancios exactos oficiales pero sí confirmó que na consulta hubo una mayoría de votos favorables: a favor de qu’al coordinador lu escueya la militancia y a favor de qu’a los candidatos electorales también los escueyan la militancia. Namás rexistróse un resultáu igualáu nel casu de la cuarta pregunta: si neses primaries han participar namás los militantes o tamién los simpatizantes.
REVOCATORIU
A lo último, los participantes apostaron por que, a pidimientu d’un porcentaxe altu de militantes, estúdiese’l cese d’un representante institucional o miembru de la dirección. Nesti últimu casu, Orviz opinó que tendría que cambiase la llexislación electoral «pa que los cargos nun seyan del electu, sinón del cuerpu electoral que-y permitió ostentar esa representación».
Asina, ábrese agora un alderique internu na organización sobre’l procedimientu afayadizu pa los procesos revocatorios. El coordinador xeneral considera que si’l cargu a cesar sal escoyíu nunes llistes abiertes nun ye normal que lu torne una executiva, porque tendría que tornalu’l mesmu cuerpu electoral que lu escoyó, ya seyan los militantes o tamién los simpatizantes. Na so opinión habría que realizar una segunda consulta sobre’l cese. «Nun ye normal qu’al dirixente A lu escueyan en primaries abiertes y depués lu cese un un órganu de dirección», apuntó.