(EUROPA PRESS) La Organización de Naciones Uníes pa la Educación, la Ciencia y la Cultura (Unesco) alertó de la falta de meyores a nivel global dende’l 2007 nos esfuerzos pa rebaxar el númberu de neños que tán sin escolarizar en tol mundu.
Nun comunicáu, l’axencia de Naciones Uníes esplicó que los últimos datos demuestren que 58 millones de neños tán fuera del sistema educativu, lo que denota que namás s’esperimentó «una pequeña meyora» na situación de los menores sin educación dende’l 2007.
Sicasí, l’estudiu ellaboráu pola Unesco sorraya que les meyores nesti campu son posibles, por culpa de que 17 países llograron rebaxar el númberu de neños sin escolarizar en «casi un 90 por cientu» en poco más d’una década apostando por poner en marcha midíes «positives», con iniciatives como l’abolición de les tases escolares, la introducción de planes d’estudios más destacaos y l’apoyu económicu a les families sin recursos.
Los datos d’esti estudiu va presentalos en rueda prensa la Unesco esti xueves nel marcu de la xunta de l’Asociación Global pa la Educación, que va celebrase en Bruxeles, na que ta previsto que los países de la comunidá internacional se comprometan a invertir na escolarización de los neños.
«Xunto colos últimos datos de la Unesco qu’apunten que les ayudes a la educación volvieron cayer otra vez, la falta de meyores na reducción de la cifra de neños sin escolarizar confirma los nuesos mieos. Nun hai oportunidá, en tou casu, de que los países llogren los oxetivos d’educación primaria universal nel 2015», aseguró la directora xeneral de la Unesco, Irina Bokova.
«Nun podemos ver estes noticies con más inercia. Al contrario, tenemos que facer sonar l’alarma y movilizar la nuesa voluntá política pa garantizar que se respeta’l derechu de cada neñu a la educación», aseguró.
Los nuevos datos de neños sin escolarizar muestren que cerca d’un 43 por cientu de los neños sin colexu de tol mundu, un total de 15 millones de neñes y 10 millones de neños, pue que nunca lleguen a poner un pie nuna clase si l’enclín actual sigue.
