(EUROPA PRESS) El Tribunal Superior de Xusticia tornó los recursos plantegaos polos colexos Peñamayor y Los Robles y da la razón a la Conseyería d’Educación que, «en cumplimientu con la LOE», retiró los conciertos educativos con dichos centros por segregar a los alumnos por sexos.
Dambos centros presentaren recursu contra la decisión del 11 d’abril del 2013 de refugar l’ayuda a dichos colexos. Agora en sentencia del 23 de xunu da la razón a la conseyería y asume les sos tesis de que nun hai «vulneración del derechu a la educación nin a la llibertá ideolóxica y que se siguió’l procedimientu correctu y llegal», según indicó esti miércoles la conseyera del ramu, Ana González.
Amás, según esplicó González, a esta sentencia suma otra sentencia del Supremu emitida’l pasáu 17 de xunu onde s’eleva de los 60.000 a los dos millones d’euros la fianza impuesta a los centros que, de manera cautelar siguen recibiendo les ayudes per parte del Principáu.
«La conseyería sigue pagando estos conciertos a pesar de nun concedelos, en casu de que nun recurran la sentencia de la TSXA o que vuelvan dar la razón al Principáu nel Supremu, vamos tar atentos a que se devuelva esti dineru a les arques del Principáu», dixo González.
Asina indicó que se trata d’unos 700.000 euros más intereses nel casu del Peñamayor y unos 600.000 más intereses nel de Los Carbayos, sumando asina la cifra global de los dos millones.
Ana González mostró’l preste de la conseyería al ver refrendada polos xulgaos la so decisión y destacó que la conseyería caltién el mesmu criteriu ante los cambios que supón la llei Wert que si dexa los conciertos con colexos que segreguen por sexos. Asina, González recordó amás que ye’l Principáu’l que tien les competencies pa la planificación educativa y nestos momentos nun son necesarios más places escolares, sinón que la demanda ta cubierta coles places públiques y les places de la rede concertada.
