(EUROPA PRESS) L’aspirante a liderar el PSOE Pedro Sánchez defendió esti miércoles nun actu en Catalunya la reforma de la Constitución Española. Dixo que tendría d’apostar por un federalismu asimétricu qu’abogara por un tratu «fiscal especial» pa Catalunya y la so reconocencia como nación, ente otres cuestiones.
Nun alcuentru con periodistes, declaróse «federalista polos cuatro costaos», y precisó qu’esti tratu fiscal nun consistiría en dar a la Generalitat una financiación foral como la del País Vascu y Navarra, un tipu de financiación que sí ye partidariu de caltener pa estos dos territorios.
Nun entró en munchos en detalles, pero esplicó qu’esta financiación diferenciada podría pasar per que Catalunya «recaudara» y non solo xestionara los impuestos que tien vencíos, y dixo que, en tou casu, ye daqué sobre lo que se debería dialogar y negociar.
L’aspirante socialista, que ta atropando avales pa formalizar la so candidatura a liderar el PSOE, añadió que «hai qu’acabar col déficit fiscal» que tien la comunidá catalana, y sentenció qu’una Catalunya fuerte merez un sistema de financiación tamién fuerte.
Tamién esplicó qu’otru de los aspectos nos que podría visualizase esti federalismu asimétricu ye en que la Generalitat tuviera competencies «esclusives» en temes como la cultura y la llingua, y mostróse críticu cola política de segregación llingüística que, al so xuiciu, quier imponer el ministru José Ignacio Wert.
Aseguró que’l so discursu sobre la reforma constitucional va ser coherente en tou momentu, garantizando que lo dixo esti miércoles en Barcelona sobre’l federalismu asimétricu caltiénlo «en Sevilla, nel País Vascu y en Madrid».
