(EUROPA PRESS) El primer ministru de l’autoproclamada República Popular de Donetsk, Alexander Borodai, consideró que «nun hubo altu’l fueu» y esclaró que «nun va haber nengún» porque, según denunció, les fuerces ucranianes bombardiaron la contorna de la ciudá de Slaviansk, onde los separatistes prorrusos baltaron un helicópteru militar.
«Güei foi un día normal. Slaviansk y un distritu de la ciudá de Snezhnoye recibieron ataques de l’artillería», dixo Borodai, revelando que, amás, entamó un enfrentamientu nos suburbios de Donetsk cercanos al aeropuertu.
Nesti contestu, caltuvo que l’altu el fueu declaráu pol Gobiernu de Petro Poroshenko, como parte del so plan de paz, asina como poles rexones de Donetsk y Lugansk, anque de forma unillateral, y que tendría de rexir hasta’l próximu vienres, ye «un despropósitu».
«Falemos col grupu de contactu y alcordemos un altu’l fueu, pero creo que se convirtió nuna xirigonza. Kiev nun quier parar la guerra. La nuesa xente ta morriendo, anque l’enemigu tamién sufre perdes. Anunciu oficialmente que nun hubo alto’l fueu y, a xulgar polos hechoa, nun va haber nengún», afirmó.
Borodai acusó al Gobiernu ucranianu de «intentar embaucar» a los separatistes prorrusos «enviando un grupu de contactu que, en realidá, nun inflúi sobre nada, nun tien poderes». «Asina que nun tenemos namás que siguir lluchando», sorrayó, acordies cola axencia de noticies rusa Itar-Tass.
Pela so parte, el cabezaleru de la República Popular de Donetsk, Denis Pushilin, acusó al Gobiernu ucranianu de «sabotiar» los acuerdos d’altu’l fueu col so bombardéu contra la población de Slaviansk.
«Sobre cinco persones morrieron y un convói de vehículos blindaos avanzó hacia la ciudá de Donestk dende l’área del aeropuertu. Tratóse d’una corta llista de les actividaes agresives de les tropes d’ocupación nel nuesu territoriu», indicó.
«Ésti ye’l preciu de los acuerdos con Kiev. Creemos que les autoridaes de Kiev consideráronlo una formalidá necesaria pa roblar l’alcuerdu d’asociación económica cola Unión Europea (UE)», señaló, antes d’afirmar que’l Gobiernu central «precisa polo menos una tregua formal, a pesar de qu’ésta nun existe de facto».
POSIBLE FIN DEL ALTU’L FUEU
Na mesma llinia, el serviciu de prensa de Poroshenko reveló que «el xefe d’Estáu nun refuga que l’altu el fueu se llevante antes de lo previsto, puesto que tán violándolu costantemente», n’alusión al ataque al helicópteru militar en Slaviansk, que dexó nueve muertos.
Según Kiev, los milicianos dispararon hasta 35 veces contra’l MI–8, que tresportaba a los técnicos encargaos d’instalar los equipos necesarios pa supervisar les violaciones del plan de paz de Poroshenko p’acabar cola revuelta separatista nel este del país.
Pela so parte, el voceru militar Vladislav Seleznyov caltuvo que «combatientes rebeldes que taben escondíos na población de Bilbasovka dispararon un cohete» contra l’helicópteru militar, que sobrevolaba la contorna de la ciudá de Slaviansk, en Donestk.
«Nuna xunta que caltuvo esta tarde colos comandantes del Exércitu y la Policía, el presidente ordenó abrir fueu sin vacilaciones (contra los responsables d’esti ataque)», apuntó’l serviciu de prensa.
