(EUROPA PRESS) Les indemnizaciones por despidu van tributar más tres la entrada a valir de la reforma fiscal del Gobiernu, anque van contar con un mínimu exentu de 2.000 euros por añu trabayáu.
Asina lo señaló’l secretariu d’Estáu de Facienda, Miguel Ferre, nuna rueda de prensa xunto al ministru de Facienda y Alministraciones Públiques, Cristóbal Montoro, pa esplicar les llinies xenerales de la reforma.
Hasta agora, les indemnizaciones por despidu namás tributaben si superaben el máximu que marca la llei (los 45 díes por añu trabayáu antes de la reforma llaboral y los 33 díes tres la reforma).
Tres la entrada en vixencia de la reforma fiscal, toles indemnizaciones por despidu van tener que tributar, anque van beneficiase d’un mínimu exentu de 2.000 euros por añu trabayáu, lo que va permitir que los contribuyentes con sueldos de 20.000 euros o menos nun tengan que pagar a Facienda cuando los despidan.
En concreto, los contribuyentes con sueldos de 20.000 euros al añu que vayan recibir una indemnización por despidu de 1.833 euros por añu van siguir exentos de tributación. De la mesma manera, tolos contribuyentes que tuvieren sueldos inferiores a 20.000 euros van siguir disfrutando de la exención del 100% de la so indemnización si son despidíos.
Sicasí, los que percibieren un sueldu de 30.000 euros al añu y tengan derechu a una indemnización de 2.750 euros por añu trabayáu van disfrutar d’una exención del 72,72% del total, tres aplica-yos el mínimu exentu.
Los que cobraren 40.000 euros al añu y tengan derechu a una indemnización de 3.666 euros por añu van beneficiar d’una exención del 54,55%, mientres que los que percibieren un sueldu de 50.000 euros y vayan recibir una indemnización de 4.583 euros al añu tres despidilos, van disfrutar d’una exención del 43,64%.
Pela so parte, los contribuyentes que cobraren un sueldu de 100.000 euros al añu y, tres los despidos, tengan derechu a una indemnización de 9.166 euros por añu trabayáu, van tener derechu a una exención del 21,82% na indemnización, una vez aplicada la exención.
A lo último, los que disfrutaren un sueldu de 150.000 euros al añu añu y vayan percibir una indemnización de 13.750 euros por añu van tener una exención final del 14,54%.
