(EUROPA PRESS) El presidente d’Estaos Uníos, Barack Obama, dixo que ta dispuestu a llevar a cabu «acciones militares precises» contra l’Estáu Islámicu d’Iraq y Siria (ISIS), anque refugó que les tropes estaounidenses vayan combatir otra vuelta n’Iraq.
«Vamos tar preparaos pa llevar a cabu una acción militar precisa y dirixida (contra’l ISIS y los sos aliaos), siempre y cuando la situación sobre’l terrén lo requiera», dixo na rueda prensa qu’ofreció esti xueves dende la Casa Blanca.
Obama esclaró que, nel casu d’optar por esta acción militar «precisa y dirixida», «consultaría col Congresu, colos líderes iraquinos y colos líderes rexonales» porque «la respuesta más efectiva contra una amenaza como l’ISIS tien que suponer n’última instancia una alianza liderada polos iraquinos».
Tamién esclaró que, «anque Estaos Uníos va ayudar a los iraquinos a lluchar contra los terroristes qu’amenacen al so pueblu, a la rexón y a los intereses estadounidenses, les tropes estaounidenses nun volverán combatir n’Iraq».
«Nun tenemos la capacidá de resolver esti problema simplemente enviando decenes de miles de tropes y comprometer la cantidá de sangre y dineru que yá gastamos n’Iraq. Esto tien que ser daqué que resuelvan los iraquinos», sorrayó.
AYUDA MILITAR
A pesar de la so reticencia a una operación militar sobre’l terrenu, Obama insistió en que «a Estaos Uníos nun-y interesa ver una guerra civil n’Iraq». «Non solo por razones humanitaries, sinón porque pue desestabilizar la rexón y, obviamente, cuestiones como la enerxía siguen siendo importantes», señaló.
Por ello, afirmó qu’Estaos Uníos va siguir ayudando a Iraq y, nun primer pasu, anunció que va enviar «hasta 300 asesores militares p’aconseyar y ayudar a les fuerces iraquines a siguir alantre», que van sumase al grupu d’asesores militares que’l país norteamericanu yá tenía al traviés de la so Embaxada en Bagdad.
«Y vamos siguir aumentando’l nuesu apoyu a les fuerces de seguridá iraquines. Tamos preparaos pa crear un centru d’operaciones conxuntes en Bagdad y nel norte d’Iraq pa compartir Intelixencia y coordinar los planes pa enfrentar l’amenaza terrorista del ISIS», avanzó.
El xefe d’Estáu recordó qu’Estaos Uníos yá ta ayudando a Iraq, puesto que «nos últimos díes asitió activos militares adicionales na rexón». «Aumentamos significativamente los nuesos activos d’Intelixencia pa que podamos tener un meyor cuadru de lo que ta pasando dientro d’Iraq», detalló.
Obama confió en qu’esti trabayu d’Intelixencia permita a Estaos Uníos «tener un mayor entendimientu de lo que ta faciendo l’ISIS, ónde ta llocalizáu y cómo podemos ayudar a combatir esta amenaza». «Yá tamos llogrando más información sobre potenciales oxetivos asociaos al ISIS», reveló.
