(EUROPA PRESS) El diputáu de Foru na Xunta Xeneral d’Asturies, (JGPA) Manuel Peña, esixó esti xueves al Gobiernu del Principáu d’Asturies, en concreto a la Conseyería d’Educación, que «respete’l derechu de los padres a que los sos fíos cursen simultáneamente llingua asturiana y segunda llingua estranxera, sin vese obligaos a renunciar a nenguna d’elles».
Peña, al traviés d’una nota prensa, dixo que «nun ye de recibu» que’l Principáu, al contrariu qu’otres comunidaes autónomes, nun publicara’l decretu del currículu de Primaria. A xuiciu del diputáu de Foru esi comportamientu «inscribióse nel marcu de rebeldía de la Conseyera d’Educación, manifestando la so ríxida oposición al desarrollu de la Lomce, que va tener consecuencies bien negatives pa los alumnos asturianos».
Pa Foru, les noticies rellacionaes con que la Conseyería d’Educación, Cultura y Deportes, nun ufierte la segunda llingua estranxera nel currículu d’Educación Primaria creó «una gran alarma» nos padres d’estos alumnos, que se resisten a renunciar a que los sos fíos tenga opción a la conocencia d’otres llingües «nun momentu en que ye necesario facer realidá una Europa sin fronteres». Too ello ensin arrenunciar a la conocencia de la cultura y llingua asturiana.
Peña añadió que’l Gobiernu del PP ye «corresponsable» tamién d’esta situación de confrontación que s’evitara si aceptara les enmiendes a la Lomce presentaes por Foru, en concreto la rellacionada cola Segunda Llingua Estranxera pa que figurara como asignatura obligatoria..
El diputáu anunció la presentación d’una proposición non de llei na qu’encamienta al Conseyu de Gobiernu a desarrollar y publicar urxentemente’l Decretu del currículu de Primaria del Principáu d’Asturies y a adoptar les midíes pertinentes pa que’l mentáu decretu, tantu’l prurillingüismu, al traviés de la posibilidá d’elección d’una segunda llingua estranxera, como’l nuesu patrimoniu cultural per mediu de la Llingua Asturiana o la Cultura asturiana, tengan la reconocencia necesaria para puean ser cursaes llibremente polos padres de los alumnos sin vese obligaos a renunciar a nengunes d’elles.