(EUROPA PRESS) El conseyu d’alministración de la Compañía pa la Xestión de Residuos Sólidos d’Asturies (Coxersa S.A.O), presidíu pola conseyera de Fomentu, Ordenación del Territoriu y Mediu Ambiente, Belén Fernández, aprobó esti miércoles les bases que van rexir la convocatoria pública pa la contratación d’una asistencia técnica esterna pa la redacción del proyectu d’obres d’ampliación del vertederu central d’Asturies.
El presupuestu base de licitación d’esti serviciu ye de 60.000 euros (IVA non incluyíu) y el plazu d’execución ye de cuatro meses y mediu.
Les consultores que quieran optar a facese col contratu d’asistencia técnica esterna tendrán de contar «con un equipu profesional d’amplia formación y esperiencia nel ámbitu de xestión de residuos y la redacción d’Estudios d’Impactu Ambiental», según informó’l Gobiernu d’Asturies al traviés d’una nota prensa.
L’oxetu del contratu va ser la redacción d’un proyectu d’obres nel que se defina de manera concreta’l tipu de construcción pola que s’opta pa llograr ampliar n’altor la capacidá pa recibir residuos del vertederu, según el correspondiente analís d’impactu ambiental (agües superficiales, lixiviaos y biogás) y les correlatives propuestes de minimización del mesmu.
Coxersa va solicitar a l’axudicataria qu’analice polo menos trés propuestes constructives pa l’ampliación y qu’opte pola más ventayosa en términos operativos, económicos y ambientales. La empresa tamién va encargase de redactar el proyectu básicu ambiental necesariu pa llograr l’Autorización Ambiental Integrada (AAI) previa a la so construcción y el correspondiente Estudiu d’Impactu Ambiental que tien qu’acompañar al proyectu. Coles mesmes va siguir la tramitación ambiental pa incorporar al proyectu constructivu les midíes que pudieren establecese na AAI.