(EUROPA PRESS) El director d’Atención Sanitaria, Antonio Álvarez, dixo esti miércoles en rueda prensa que’l programa de xestión de pacientes Millennium, de la empresa Cernir, funciona «con normalidá y plenes garantíes» pal tratamientu y la seguridá de los pacientes, lo que nun quita que «surdan incidencies ya rocees».
Esplicó que, acordies coll previsto, l’hospital punxo en marcha esta selmana «un programa de formación continua de duración llendada y adicional a la que yá recibieron tolos usuarios, polo que 150 profesionales informáticos arreglen en tiempu real les dudes del personal médico y d’enfermería».
«Cuando se deprende a conducir ún empieza amodo, con precuru; lo mesmo ta pasando con Millenium», dixo Antonio Álvarez.
Na mentada rueda prensa, Álvarez confió en que’l periodu d’adaptación en que ta somorguiáu l’hospital seya lo más cortu posible, de manera que profesionales, aplicaciones y tecnoloxíes algamen «l’óptimu» en feches próximes.
De momentu, aseguró que l’HUCA presenta yá una actividá prácticamente normal, con 391 pacientes hospitalizaos, 1.700 citaos pa güei, más de 2.000 urxencies atendíes dende’l pasáu sábadu y más de mediu centenar d’intervenciones quirúrxiques de distintes especialidaes, incluyida oftalmoloxía y dalguna cardiaca de gran complexidá.
A lo último, precisó que la estancia media de l’atención n’urxencies (tiempu que’l conxuntu de los pacientes permanez como media nel serviciu pa que los diagnostiquen y en dellos casos los trate y otra vuelta los evalúen) ye asemeyada a la de les antigües instalaciones d’El Cristo o hasta un poco inferior.
Pela so parte, el director xerente del Serviciu de Salú del Principáu d’Asturies (Sespa), Tácito Suárez, sorrayó que l’hospital entama agora una nueva trayectoria con una atención más centrada nel paciente, más rápida y precisa.