(EUROPA PRESS) El conseyeru de Sanidá del Principáu, Faustino Blanco, confirmó esti martes l’acabación del treslláu del vieyu al nuevu Hospital Universitariu Central d’Asturies (HUCA), col últimu convói que salió ente les 12.30 y les 13.00 hores dende El Cristo a La cadellada. El procesu acaba «sin incidencies» y con un balance de 236 tresllaos, 348 ingresos y 1.419 urxencies atendíes, según apuntó en rueda prensa.
Blanco, que compareció ante los medios tres la xunta del Conseyu de Gobiernu xunto al conseyeru de Presidencia y Vocera del Executivu, Guillermo Martínez, calcó en que’l cambiu de centru ta faciéndose con «normalidá», teniendo en cuenta que se ta tratando con un material bien sensible: «la salú de los ciudadanos».
Al respecto, refugó que’l treslláu fuera «caóticu» y asegura que tolos servicios y sistemes implantaos nel nuevu HUCA tán funcionando correctamente. Coles mesmes, comentó qu’ante’l treslláu procedióse al llevar a 30 pacientes al Hospital Vital Álvarez-Buylla; 21 al Hospital Monte Naranco; 18 al del Valle del Nalón; 36 al Hospital de Jove; 55 a Cabueñes; y 78 al San Agustín.
Blanco punxo en valor el llabor «coordináu y cooperativu» ente los profesionales sanitarios, de tresporte y de seguridá mientres l’operativu de treslláu qu’empezó esti pasáu sábadu, 14 de xunu. Amás, indicó qu’esti miércoles van abrir 10 quirófanos pa l’actividá programada y esti martes va llevase a cabu la primer ciruxía complexa, de Cardioloxía.
«El vieyu hospital forma parte de la historia, con importancia na tresformación y modernización de la sanidá española», remarcó’l conseyeru, asegurando que’l nuevu HUCA va ser relevante nel camín de la innovación pa disponer d’un hospital tecnolóxicu y sin papeles nel que, xunto cola atención asistencial, destaque l’actividá investigadora.
Faustino Blanco, considera razonable que se produxeren «dellos imprevistos» ante la complexidá del procesu de treslladáu, pero calcó en que la seguridá tuvo garantizada. Pal conseyeru, habría qu’almitir «un ciertu grau de tolerancia» ante delles situaciones non previstes, repitiendo qu’eses puntales situaciones prodúcense «dientro d’una normalidá absoluta».
Tocantes a les instalaciones d’El Cristo, indicó que van caltenese’l centru Comunitariu de Tresfusiones y los llaboratorios d’investigación, como únicos servicios sanitarios, anque tamién van permanecer nel vieyu HUCA los almacenes y la llavandería.
MILLENIUM
Amás, al respecto de la plataforma informática ‘Millenium’ qu’opera nel nuevu HUCA, el conseyeru defendió la so calidá testada mundialmente. Amás, recordó que cuenten con él centros como la Clínica Mayu.
Asina, dixo entender les dudes de profesionales ante l’adaptación al nuevu sistema qu’implica «pasar del bolígrafu y el papel a una ferramienta informática», pero repitió que se trata d’una «ferramienta potente» y pa la so familiarización los profesionales cuenten con soporte asistencial «en tiempu real», asina como un aula pa perfeccionamientu.
«Tenemos que tener un tiempu de calma y dedicación hasta tener soltura», pidió’l conseyeru, encamentando «nun cuestionar el sistema». «Ye una ferramienta nueva y requier un periodu d’adaptación en tiempu real, non simuláu», añadió.