(EUROPA PRESS) A pesar de ser pioneros del punk y una de les bandes más influyentes de la historia de la música, los Ramones nun disfrutaron en vida del éxitu comercial que se-yos presupón echando agora la vista atrás.
Sirva como exemplu que’l discu debú de la banda, tituláu ‘Ramones’ y editáu n’abril de 1976, certificóse agora como Discu d’Oru na RIAA (Recording Industry Association of America), por algamar les 500.000 unidaes vendíes.
Los cantares d’esti debú son clásicos del xéneru como ‘Blitzkrieg Bop’, ‘Beat on the Brat’, ‘Judy is a Punk’, ‘I Wanna Be Your Boyfriend’, ‘Chain Saw’, ‘Now I Wanna Sniff Some Glue’, ‘I Don’t Wanna Go Down to the Basement’, ‘Havana Affair’, ’53rd & 3rd’, ‘I Don’t Wanna Walk Around With You’ o ‘Today Your Love, Tomorrow the World’.
Dende la so nacencia en 1974 y hasta la so separación en 1996, Ramones fueron siempre una referencia pa miles de músicos de tol mundu, pero los sos ingresos llegaron fundamentalmente de los conciertos, polo que malpenes dexaron d’actuar.
Eso sí, la banda tien otru Discu d’Oru anterior a ésti del so debú, correspondiente al recopilatoriu ‘Ramones Mania’, que llogró tal distinción en 1994, seis años después de la so edición orixinal el 1988.
Esta reconocencia al so primer álbum llega cuando Johnny, Joey y Dee Dee Ramone, trés de los miembros fundadores, yá tán muertos. L’únicu integrante orixinal de la banda ye Tommy Ramone, que ta retiráu del mundu de la música dende va llustros.
Sí se caltien n’activo Marky Ramone, el baterista que sustituyó a Tommy en 1978. Ello ye que la próxima selmana va visitar España p’actuar col so actual grupu en Barcelona, Valencia, Murcia, Granada, Madrid (Neox Rock Festival) y Ourense (Derrame Rock).
