(EUROPA PRESS) La riqueza nacional midida pol PIB nominal va aumentar hasta nunos 45.000 millones tres el cambiu de base de la Contabilidá Nacional que va facer l’Institutu Nacional d’Estadística (INE), que va elevar el PIB nominal ente’l 2,7% y el 4,5%.
Si tenemos en cuenta qu’el PIB nominal del 2010, añu que va tomase de base pal cambiu metodolóxicu, foi 1.062.591 millones d’euros, podría dicise que l’impactu podría ser d’ente 28.689 y 47.800 millones.
El cambiu del INE compónse de cambios metodolóxicos y cambios estadísticos. Nel primer casu, los cambios (capitalización del gastu n’investigación y desarrollu, n’armamentu militar y otros) podríen suponer un aumentu d’ente’l 1,2% y el 1,5% del PIB nominal.
Pela so parte, los cambios estadísticos y otros cambios (incorporación d’información estadística nueva como les actividaes illegales) elevaríen la riqueza nacional ente un 1,5% y un 3% (ente 15.938 y 31.877 millones).
Según l’INE, el cambiu de base que va facese taría en llinia colos resultantes del cambiu efectuáu nel añu 2005, cuando’l PIB en términos corrientes aumentó ente un 3,2% pal añu 2000 y un 4,9% nel añu 2004.
Los cambios que van introducise son los derivaos de l’adaptación de la Contabilidá Nacional y Rexonal d’España a les normes del nuevu sistema européu de cuentes (SEC 2010) aprobáu en mayu del 2013.
De los numberosos cambeos metodolóxicos, los más significativos son la reconocencia como inversión tanto del gastu n’investigación y desarrollu (I+D) y del gastu nos sistemes d’armamentu.
Nel SEC 2010 los gastos n’I+D trátense como inversión n’activos fixos y poro, la depreciación de dichos activos como consumu de capital fixu. Esti cambiu va suponer una subida del PIB respectu al calculáu según la metodoloxía de l’anterior versión del sistema de cuentes.