(EUROPA PRESS) El líder d’Izquierda Unida y voceru del grupu parlamentariu La Izquierda Plural (IU-ICV-CHA), Cayo Lara, avisó esti miércoles a los partíos qu’apoyen la socesió del rei Juan Carlos nel so fíu, el futuru Felipe VI, que los ciudadanos van facer pagar nes urnes na próxima cita electoral por negase a «dar la voz a la ciudadanía» nun referendu sobre’l modelu d’Estáu.
Mientres el debate de la Llei d’Abdicación nel Congresu, Lara, que llevaba una escarapela republicana igual que los demás diputaos del so grupu parlamentariu, censuró que’l Príncipe d’Asturies vaya a heredar la Xefatura del Estáu «como si fuera una propiedá privada» y calificó’l procesu d’abdicación como «una maniobra escura y palaciega».
Por ello, defendió la necesidá de convocar un referendu pa escoyer ente monarquía o república y preguntó a los que s’oponen a esta consulta «por qué temen» que los ciudadanos s’espresen nes urnes. «Queremos que se convoque un referendu y se pregunte al pueblu español qué quier nestos momentos cruciales de la historia. Falamos de monarquía o democracia», resumió.
El líder d’IU sorrayó qu’España alcuéntrase «nun momentu históricu» ante’l que «naide pue permanecer quietu» y pidió l’abertura d’un nuevu procesu constituyente qu’abra un alderique «hacia un nuevu proyectu de país», nel que tien «especial trescendencia» la forma d’Estáu. «Sería muncho más democrático consultar al pueblu sobre esti puntu que nun facelo», caltuvo.
Lara considera qu’esto permitiría a España «subir un pasu más na escala democrática» y refugó la visión «paternalista» de la democracia y el despreciu «absolutu» al pueblu que, al so xuiciu, supón nega-y el derechu a decidir.
LO IMPORTANTE YE LA CALIDÁ
La vocera d’Unión, Progresu y Democracia (UPyD), Rosa Díez, señaló pela so parte que «nun tien sen plantegar el debate República versus Monarquía» porque «la forma d’Estáu nun ye tan importante», sinón «la calidá del sistema».
«Lo importante nel terrén práctico ye la ciudadanía democrática, non la forma institucional del réxime que lu garantiza. La forma del Estáu nun garantiza nada, lo importante ye’l bon funcionamientu de la democracia y de les sos instituciones», esplicó Díez mientres el debate del proyectu de llei nel Congresu.
N’espresando la so reconocencia a la figura de Juan Carlos de Borbón, la cabezalera d’UPyD dixo que «güei nun ye’l día pa debatir sobre la forma del Estáu», polo que criticó que los haya «que pretendan que l’abdicación abra una crisis constitucional qu’obligue a replantegase la institución».