El presidente del Principáu d’Asturies, Javier Fernández, robló güei el decretu 7/2019, de 1 d’abril, pol que se convoquen elecciones a la Xunta Xeneral y que va entrar a valir mañana, tres la so publicación nel Boletín Oficial del Principáu (Bopa). Asina, van quedar oficialmente convocaos los comicios que se van celebrar el domingu 26 de mayu.
L’artículu 25.4 del Estatutu d’Autonomía del Principáu señala que les elecciones van ser convocaes pol presidente, nos términos previstos na Llei Orgánica de Réxime Electoral Xeneral, de manera que se celebren el cuartu domingu de mayu de cada cuatro años, ensin perxuiciu de lo que dispongan les Cortes Xenerales, col fin esclusivu de coordinar el calendariu de les diverses consultes electorales. Nel mesmu sentíu pronúnciase l’artículu 15.1 de la Llei del Principáu d’Asturies 14/1986, de 26 d’avientu, sobro Réxime d’Elecciones a la Xunta Xeneral, que, nel so apartáu segundu, recueye espresamente que’l decretu de convocatoria d’elecciones va ser publicáu a otru día nel Bopa y va entrar a valir el mesmu día de la so publicación.
Campaña electoral
Per otru llau, l’artículu 25 de la mentada Llei 14/1986 señala que’l decretu de convocatoria d’elecciones va afitar la fecha d’entamu de la campaña electoral que van poder llevar a cabu los partíos, federaciones, coaliciones o agrupaciones n’orde a la captación de sufraxos pa les sos respectives candidatures.
El decretu robláu güei pol presidente Javier Fernández especifica que “la campaña electoral va tener xuna duración de quince díes”: va empezar a les cero hores del día 10 de mayu de 2019 y va rematar a les venticuatro hores del día 24”.
Númberu de diputaos
Pela so parte, el Real Decreto 1458/2018, de 14 d’avientu, declara oficiales les cifres de población resultantes de la revisión del padrón municipal referíes al 1 de xineru de 2018, con efectos de 31 d’avientu del mesmu añu. Estes cifres son les que s’han de tener en cuenta pa realizar la repartida de diputaos a escoyer en caúna de les trés circunscripciones nes que s’estrema’l territoriu d’Asturies a efectos electorales.