El presidente del Principáu d’Asturies, Adrián Barbón, permanez ingresáu en situación estable nel Hospital Universitariu Central d’Asturies (HUCA) dende la tarde d’ayeri, cuando allegó al centru siguiendo los protocolos sanitarios establecíos al empiorar el so estáu de salú en dando positivu en covid nun test de antígenos.
Barbón realizó’l test nel marcu de la prueba masiva entamada pola Federación Socialista Asturies (FSA-PSOE) pa garantizar la seguridá nel congresu que la formación tenía de celebrar esta fin de selmana y que finalmente foi suspendíu.
En practicándo-y diverses pruebes, y ante el barruntu d’una posible neumonía, el presidente foi ingresáu na planta covid del hospital, onde ta siendo atendíu y la so situación ye estable.
La PCR que se-y realizó y el so analís posterior determinaron que se trata la variante ómicron del coronavirus, que se ta arrobinando rápido por tol mundu.
El Boletín Oficial de Principáu d’Asturies (Bopa) publicó ayeri’l decretu qu’establez que, mientres l’ausencia por enfermedá del presidente del Principáu y dende el 18 d’avientu, va ser sustituyíu nel exerciciu de les sos funciones pol vicepresidente y conseyeru d’Alministración Autonómica, Medio Ambiente y Cambéu Climáticu, Juan Cofiñu.
Por cuenta de la evolución de la pandemia y al aumentu de la incidencia del coronavirus, el Gobiernu d’Asturies llama a la prudencia y encamienta a la ciudadanía a caltener toles midíes de protección, especialmente a les persones ensin vacunar. Tamién aconseya evitar interacciones n’espacios interiores mal ventilados y recuerda la obligatoriedá del usu de mididores de CO2 nos establecimientos d’hostelería y ximnasios. La vacuna, el mázcaru y la fayadiza ventilación son los trés claves pa garantizar la seguridá.
Nestos momentos, la vacuna ye’l principal elementu de protección, cuidao que el riesgu de desenvolver una enfermedá grave ye muncho más alzáu ente les persones que nun recibieron la profilaxis contra la covid.