El conseyeru de Presidencia, Guillermo Martínez, axuntóse güei n’Uviéu colos participantes del Programa Añoranza, una iniciativa que pretende promover el realcuentru cola so tierra d’orixe y los sos familiares d’emigrantes asturianos que, por falta de recursos económicos, llevaben dellos años ensin retornar a Asturies. Nel alcuentru tamién tuvo presente la directora xeneral d’Emigración, Begoña Serrano.
La Conseyería de Presidencia reactiva asina esti programa pol que se movieron al Principáu siete persones procedentes d’Arxentina (5), Venezuela (1) y Uruguai (1). De los siete, hai seis mujer y un home con edaes que bazcuyen ente los 66 y los 88 años. Ye la primer vegada que visiten Asturies desque emigraron fai más de 50 años.
El titular de Presidencia, Guillermo Martínez esplicó que “creemos necesariu que persones que nun volvieren a la so tierra dende edá bien temprana tuvieren la oportunidá de realcontrase colos suyos, cola so tierra, colos sos amigos”. “Esa oportunidá del realcuentru ye un compromisu del Gobiernu y atreveríame a dicir qu’inclusive de tola comunidá”, añedió.
El programa, enmarcáu nel IV Plan d’Emigración, cuenta con un presupuestu de 25.000 euros. Un 15% de la población asturiana mora fora de les fronteres españoles o retornó tres años na emigración. Asturies tien un compromisu con esti colectivu, polo que’l nuevu plan, que’l conseyeru de Presidencia presentó’l pasáu mes de febreru na Xunta Xeneral del Principáu y que les sos propuestes de resolvimientu van encetar na sesión del plenu de mañana vienres, ye un preséu necesariu ya imprescindible pa dar cobertoria a estes persones.