El 12 de setiembre remata’l plazu pa presentar orixinales a los cinco premios lliterarios que’l Gobiernu d’Asturies promueve nel 2014 cola mira de consolidar, arriquecer y prestixar la llingua y cultura asturianes: el Xosefa Xovellanos de Novela; el Xuan M.ª Acebal de Poesía; el Máximo Fuertes Acevedo d’Ensayu; el M.ª Josefa Canellada de Lliteratura Infantil y Xuvenil; y el Alfonso Iglesias de Cómic.
Los requisitos pa presentase a estos premios —que llograron convertise en referente y reflexu del desenvolvimientu de la lliteratura en llingua asturiana nestes décades últimes— publicáronse nel Boletín Oficial del Principáu d’Asturies de 16 d’abril y pueden consultase nes páxines www.asturias.es y www.politicallinguistica.org. Caún de los premios tien una dotación de 3.000 euros.
Premiu Xosefa Xovellanos de Novela en llingua asturiana
El premiu decanu de les lletres asturianes llega anguaño a la so 35 edición. Ente los ganadores d’años anteriores atópense autores de prestixu reconocíu, como Xandru Fernández, Antón García, Pablo Antón Marín Estrada, Adolfo Camilo Díaz, Esther Prieto o Pablo Rodríguez Medina, ente más otros. A él pueden optar obres de tema, xéneru y estructura llibres que tengan una estensión mínima de setenta y cinco páxines a espaciu doble.
Premiu Xuan M.ª Acebal de Poesía en llingua asturiana
El Premiu Xuan M.ª Acebal de Poesía algama la so vixésima edición. Escritores como Xuan Bello, Martín López-Vega, Pablo Antón Marín Estrada o Ricardo Candás ganaron esti premiu al que pueden presentase poemarios con una estensión mínima de quinientos versos.
Premiu Máximo Fuertes Acevedo d’Ensayu en llingua asturiana
El Premiu Máximo Fuertes Acevedo cumple con ésta venti ediciones; siempres col enfotu d’abrir un espaciu pa la interpretación y reflexón n’asturianu sobre la realidá. Los ganadores d’esti premiu fueron hasta la edición actual Milio Rodríguez Cueto, Ramón d’Andrés, Ismael González Arias, Xaime González Arias, Xosé María Fernández, Xulio Arbesú, Vicente García Oliva, Lluis Portal y Beatriz Redondo Viado. El tema, xéneru y estructura de los ensayos ye llibre, y los testos presentaos han tener una estensión mínima de cincuenta páxines.
Premiu María Josefa Canellada de Lliteratura Infantil y Xuvenil
Convócase nesti 2014 la séptima edición d’esti gallardón, que premia a los ceadores n’asturianu que dirixen la so obra lliteraria a la xente mozo. Berta Piñán, Ismael González Arias, Montse Garnacho, Paquita Suárez Coalla, Milio Rodríguez Cueto y Marisa López Diz ganaron yá un premiu al que pueden presentase testos inéditos, con independencia de que sían noveles, compilaciones de cuentos, poemarios o obres de teatru.
Premiu Alfonso Iglesias de Cómic
Esti premiu, qu’honra’l nome del dibuxante Alfonso Iglesias, tien por oxetu sofitar una manifestación cultural relevante y puxante n’Asturies. Esta ye la sesta edición d’un gallardón que na so última edición ganó Alfonso Zapico col álbum Cuadernos d’Ítaca y al que pueden presentase obres d’estilu y tema llibres, pudiendo abarcar el desarrollu d’una historia única o un conxuntu d’histories