La conseyera de Servicios y Derechos Sociales, Pilar Varela, presentó güei énte la Xunta Xeneral el presupuestu del so departamentu pa 2018, que xuben a 427.018.418 euros, lo que supon una medría del 8,9% en relación con 2017. En términos absolutos, la xubida ye de 35.009.426 euros.
Esti presupuestu va faer posible caltener, y amontar en munchos casos, les prestaciones y recursos del sistema públicu de protección social, según sofitar a les persones en situación de dificultá y lluchar contra la esclusión. Nesti oxetivu enmárcase’l compromisu de presentar nel Parlamentu, antes de mayu, un proyectu de llei de garantía de derechos y mínimos vitales pa garantizar les necesidaes básiques de les persones. Nel ámbitu normativu, tamién se van presentar les nueves lleis de servicios sociales y la d’acción alcordada pa regular el conciertu social.