Dende l’añu 1996 hasta 2013 produciéronse siquier 20 ingresos hospitalarios n’Asturies por cuenta de les mancadures producíes por artefactos pirotécnicos. Según un estudiu realizáu pola Conseyería de Sanidá, el 21% de los afectaos tien menos de 15 años y el 89% son varones, principalmente con edaes entendíes ente los 15 y los 29 años. Amás, según dichu analís, el 42% de los eventos producióse pel branu, coincidiendo coles fiestes patronales.
La mayor parte de los mancaos sufrieron mancadures de distinta gravedá nes manos, incluyendo amputaciones de dellos deos ya importantes quebres y luxaciones de güesos de la mano. Asina mesmu, producióse una mancadura ocular con perforación y penetración d’un cuerpu estrañu y una hipoacusia por perforación del tímpanu.
Por tipoloxíes, los accidentes de tipu llaboral nos llugares de producción d’esti tipu d’artefactos, fueron los que tuvieron consecuencies más graves. Asina, en 1996 producióse un accidente nuna fábrica de pirotecnia nel que finaron cinco persones y un trabayador tuvo ingresáu mientres casi un añu con delles quebres de pronósticu bien grave. El branu pasáu n’otru accidente nun taller pirotécnicu, un trabayador sufrió delles quemadures en cara y tueru que precisaron tratamientu quirúrxicu.
Mientres esti periodu branizu tamién se rexistró un accidente pola esplosión desaparente d’un volador que se saldó con una importante afectación de la manzorga.
La prevención d’estos sucesos nel ambiente llaboral pasa pola implantación fayadiza de la normativa de prevención de riesgos llaborales y nos llugares d’ociu, especialmente fiestes populares, pol usu d’elementos de suxeción alloñaos de los miembros del cuerpu nel momentu del so disparu por aciu sistemes automáticos o alloñando les cargues de pólvora de brazos, estremidaes y cara