El Gobiernu d’Asturies aprobó les instrucciones y la guía práctica que van rexir la inclusión de clauses de responsabilidá social y medioambiental na tramitación de contratos del Principáu y el so sector públicu. L’Executivu autonómicu escuerre con estes iniciatives que la contratación pública porte un beneficiu social agregu, más allá de la mera prestación de servicios, la execución d’obres o l’alquisición de bienes, tal que propón l’Alcuerdu para la Competitividá Económica y la Sostenibilidá Social 2016-2019.
L’alcuerdu de concertación social destaca la necesidá d’avanzar na busca de la meyor relación ente la calidá y el preciu na contratación pública, lo qu’implica la inclusión de criterios cualitativos nesti procedimientu que valoren aspeutos como la innovación y los componentes sociales y medioambientales. Les instrucciones aprobaes agora establecen xuna serie de prescripciones pa la incorporación d’estos requisitos nes distintes fases de la tramitación de contratos.
Por casu, na fase de preparación, el presupuestu base de llicitación tendrá de reflexar, por xéneros y categoríes profesionales, los costos salariales envaloraos según el conveniu colectivu del sector, siempres qu’esi costu forme parte del preciu total del contratu. Amás, los pliegos de les clauses alministratives particulares van tener que faer referencia a la obligación del axudicatariu de cumplir les condiciones retributivas de los emplegaos, según lo dispuesto nel conveniu sectorial d’aplicación.
Amás, si la mesa de contratación identifica ufiertes anormales, va riquir al licitador qu’acredite, por aciu la documentación oportuna, el cumplimientu de les condiciones del conveniu colectivu vixente.
Como requisitu especial d’execución de los contratos va esixise, a lo menos, el cumplimientu de les condiciones recoyíes nos convenios colectivos sectoriales y territoriales aplicables, tanto pal contratista principal como para subcontratistas, ensin perxuiciu de que los emplegaos puedan beneficiase de posibles meyores. La Dirección Xeneral de Trabayu va ser la encargada d’ellaborar y caltener actualizáu un llistáu de los convenios sectoriales d’aplicación pa cada contratu.
El Conseyu de Gobiernu tamién aprobó la guía práctica pa la inclusión de clauses de responsabilidá social y medioambiental na contratación, xuna midida que pretende aumentar la calidá del empléu, favorecer l’accesu al mercáu llaboral de colectivos con especiales dificultaes, impulsar la igualdá y promocionar el comerciu xustu, ente otros fines. Pa llograr estos oxetivos, el manual determina los pasos a siguir y les clauses que tienen de considerase en cada casu, que pueden ser de los siguientes tipos:
– Clauses sociales: favorecen la calidá del empléu, l’insertamientu de persones con especiales dificultaes d’accesu al mercáu llaboral, la economía social, la conciliación, la igualdá d’oportunidaes y l’equiparación salarial.
– Clauses medioambientales: establecen la selección de productos, la prestación de servicios y l’execución d’obres que primen la eficiencia enerxética, la sostenibilidá, el reciclaje y l’amenorgamientu d’emisiones, ente otres.
– Clauses étiques: pretenden promocionar el comerciu xustu, la llucha contra la corrupción y el fraude fiscal, etcétera.
La guía foi ellaborada por un grupu de trabayu constituyíu’l 30 de setiembre de 2016 y empobináu pola Conseyería d’Empléu, nel que participaron técnicos de distintos departamentos de l’Alministración. Amás, incorporáronse suxerencies de la Federación Asturiana d’Empresarios y de los sindicatos UXT y CCOO. Esti manual y les instrucciones dexen al Executivu avanzar nel cumplimientu d’unu de los principales compromisos de la concertación social apautada cola patronal y les organizaciones sindicales.