L’Executivu aprobó’l cambéu del decretu 76/1998, de 17 d’avientu, d’actividaes xuveniles al campu, para afaelo a los cambeos esperimentaos nes postreres dos décades y a la lexislación estatal, según para incorporar procedimientos de simplificación alministrativa na tramitación de les autorizaciones.
Los cambeos afecten a les definiciones de campamentos, campos de voluntariáu o de trabayu y colonies xuveniles. Amás, incorpórense dos nuevos apartaos: les acampaes itinerantes, que se consideren estancies ocasionales ensin tiendes de campaña y que la so duración nun va poder entepasar de dos nueches, y les actividaes de calter mistu (aquelles qu’inclúin más d’una de les tipoloxíes citaes). Queden escluyíes del ámbitu del decretu les actividaes que nun esixen pernoctación.
Per otra parte, afáense les titulaciones riquíes para participar nel desenvolvimientu les actividaes que regula’l decretu, acordies con el Catálogu Nacional de Cualificaciones Profesionales, cola incorporación de dos nuevos títulos: Dinamización d’actividaes de tiempu llibre educativu ya infantil y Dirección y coordinación d’actividaes de tiempu llibre educativu infantil y xuvenil.
Al respective de los trámites alministrativos, impúlsense ferramientes de simplificación para empreses y entidaes promotores por aciu la sustitución de l’autorización previa por declaraciones responsables, qu’han de presentase siquier 15 díes antes del entamu de les actividaes, frente a los 60 que riquen les autorizaciones.