Los agospiamientos asturianos de turismu rural sumaron n’agostu 303.981 pernoctaciones, la cifra más alta del país y un 12,5% superior a la rexistrada nel mesmu períodu de 2016. En total, recibieron a 62.012 visitantes, lo que supon una crecedera del 9,9% respectu al añu pasáu, según los datos publicaos güei pol Institutu Nacional d’Estadística (INE).
Esti tipu d’ufierta turística meyora en toos el indicadores: l’empléu amóntase un 16,2%, la estancia media aumenta un 0,11% y l’ocupación xube un 1,52%.
El director xeneral de Comerciu y Turismu, Julio González Zapico, valoró especialmente l’impulsu del turismu internacional, que xeneró n’agostu un 35% más de pernoctaciones que nel mesmu mes de 2016, y la crecedera de los puestos de trabayu.
“Una de les meyores noticies que nos dexa la estadística del INE ye la del empléu, con una media de crecedera en tolos tipos d’agospiamientu del 7,3%, impulsada en gran midida pol turismu rural, que xube un 16,2%, y los apartamentos turísticos, con un 21,5%”, sorrayó. Al so xuiciu, esti indicadores son relevantes porque faen referencia a la creación d’empléu nel mediu rural y n’unu de los sectores, el turísticu, que xenera mayor equilibriu territorial.
Según los datos del INE, Asturies recibió n’agostu a un total de 438.753 visitantes que xeneraron 1.426.638 pernoctaciones, con una crecedera del 1,1% y del 1,3%, respectivamente, en comparanza col octavu mes de 2016. Amás, tolos subsectores turísticos rexistraron crecederes, sacante los campings, que pudieron vese más afectaos que’l restu d’agospiamientos poles condiciones meteorolóxiques.