L’Academia de la Llingua Asturiana tachó esti xueves de «vergonzosa» y «antiasturiana» la propuesta del PP, sofitada por PSOE y Ciudadanos, por que non puedan cursase convocatories billingües (asturianu y castellán) a los diputaos na Xunta Xeneral.
Nuna nota de prensa, l’Academia treslladó a la opinión pública asturiana «la so más fonda esmolición ante la falta de respetu escontra la nuesa llingua de los parllamentarios que sofitaron tal prohibición na Xunta Xeneral». Pa la Institución «refugar l’usu del asturianu xuntu col castellán nes actividaes parlamentaries da cuenta perfectamente del allugamientu, oxetivamente anti-asturiana, de dalgunos de los nuesos representantes políticos y, especialmente, de Mercedes Fernández, líder del Partíu Popular y impulsora d’esta vergonzosa iniciativa».
L’Academia amuésase «escupuliciada, al lleer el ‘tweet’ col que la Presidenta del Partíu Popular faía rumbu del so llogru» anti-asturianu: «llogremos que’l castellán sía la única llingua del parlamentu n’Asturies». Tacha esti mensaxe de manifestación inequívoca de despreciu a Asturies, de autoodiu y de falta de sensibilidá para cola cultura de los asturianos. Y dende puestu, ye impresionante qu’una dirixente política asturiana atrever a espresase nesos términos».
La Institución amuésase «sabedora de que l’arreglu de situaciones como les qu’acabamos de describir solo pasa pola reconocencia -irrenunciable- de la oficialidá de la llingua histórica del pueblu asturianu». Poro, l’Academia pide a tolos Grupos Parlamentarios que, «llegáu’l momentu, sofiten esti procesu de reconocencia xurídica del asturianu y qu’actúen (mientres esa figura llegal nun sía dafechu efectiva) dando pasos de dignificación y de planificación llingüística que, acordies con el marcu normativu vixente, enconten l’usu del asturianu en toles instituciones del país y, cuantimás, na Xunta Xeneral, órganu máximu de representación de los ciudadanos y ciudadanes d’Asturies».