El Paraninfu de la Universidá d’Uviéu acueye’l xueves 14 d’avientu, a partir de les 19.00 hores, l’actu d’entrega de los seis premios lliterarios que la Conseyería d’Educación y Cultura convocó nel 2017 cola mira de consolidar la llingua asturiana como vehículu d’espresión lliteraria de primer orde: el Premiu «Xosefa Xovellanos» de Novela (38.ª edición); el Premiu «Xuan M.ª Acebal» de Poesía (23.ª edición); el Premiu «Máximo Fuertes Acevedo» d’Ensayu (23.ª edición); el Premiu «M.ª Josefa Canellada» de Lliteratura Infantil y Xuvenil (10.ª edición), el Premiu «Alfonso Iglesias» de Cómic (9.ª edición) y el Premiu «Nel Amaro» de Teatru Profesional, que la Conseyería d’Educación y Cultura convoca anguaño pela primer vez y al que podíen presentase obres de compañíes profesionales que fueren yá estrenaes n’asturianu o gallego-asturianu, tanto orixinales como versiones o adaptaciones de títulos n’otres llingües.
Nel trescursu del actu va entregase a los gallardonaos una pieza artística otorgada en reconocencia a la calidá de les sos obres y la so significación como aportaciones sobresalientes y innovadores a la creación lliteraria en llingua asturiana. La gala va cuntar amás cola actuación musical d’Alfredo González y Silvia Quesada.
Información sobre autores y obres
Premiu Xosefa Xovellanos de Novela: Berta Piñán, pola obra Como la muda al sol d’una llagartesa
Berta Piñán (Cañu, 1963) destaca como una de les voces más sólides del surdimientu lliterariu asturianu. Profesora de Llingua y Lliteratura y académica de la llingua asturiana, empezó cultivando la poesía nesti idioma con títulos como Al abellu les besties (1986), Vida privada (1991), Temporada de pesca (1998), Un mes (2002) y La mancadura (2010), publicada n’edición billingüe asturianu-castellanu. Muestra de la so narrativa curtia son obres como La tierra entero (1995) y La maleta al agua (2005).
El xuráu del premiu decanu de les lletres asturianes decidió por mayoría conceder el gallardón a la so obra Como la muda al sol d’una llagartesa, destacando “la complexidá narrativa d’una historia bien trabada con numberosos personaxes que caltienen l’interés a lo llargo de la llectura de la obra. La novela, que parte d’un fechu criminal, percuerre distintos aspectos de la sociedá asturiana d’anguaño, sobre manera del mundu rural”.
Premiu Xuan María Acebal de Poesía: Pablo X. Suárez, pola obra Little Babilonia
Pablo X. Suárez (Orviz, Siero, 1981) ye filólogu y especialista en llingua asturiana. Ceador de la Timba Poétika y poeta oral, tien publicaos n’asturianu los poemarios Asturiana Beat (2005) y El sistema débeme una chocolatina (2011), amás del volume de relatos Yoni y yo. Ye autor tamién de les obres en castellanu Pop retórika (2010) y Cómo evitar l’apocalipsis (2016).
A la d’otorgar el Premiu «Xuan M.ª Acebal» a Little Babilonia, el xuráu destacó “el nivel llingüísticu y estilísticu y la brillantez de les imáxenes d’un testu que xuega y entemez la tradición más clásica coles referencies más pop”.
Premiu Máximo Fuertes Acevedo d’Ensayu: Xuan Santori, pola obra 42.553: depués de Buchenwald
Xuan Santori Vázquez, doctor en Filoloxía, ye una de les voces más personales de la lliteratura asturiana. Ye autor d’estudios destacaos sobre la lliteratura asturiana y el papel d’esta y los sos cultivadores nel desenvolvimientu, normativización y normalización de la llingua asturiana (Milenta voces. Visiones del Surdimientu, 2006; El Surdimientu y la lliteratura asturiana: normalización y estandarización, 2013). Foi gallardonáu colos premios de poesía «Teodoro Cuesta» de 1999 y «Elvira Castañón» de 2008, asina como col premiu de la crítica d’Asturies nos años 2005 y 2008.
El gallardón foi concedíu por unanimidá del xuráu, que nel so fallu destacó “el xuegu de ficción y realidá consiguíu al traviés de la unión d’imaxe, testimoniu y documentación y la dimensión internacional qu’adquier la obra”.
Premiu M.ª Josefa Canellada de Lliteratura Infantil y Xuvenil: Berta Piñán, pola obra Vida nel campu
Berta Piñán (Cañu, 1963) foi ganadora de la primer edición del Premiu «María Josefa Canellada» cola obra Arroz, agua y maíz (2009), y el públicu infantil y xuvenil foi’l destinatariu de títulos firmaos por ella como Lula, Lulina (1996), El branu de Mirtya (2005), Tres sieglos construyendo la igualdá (2005), Les coses que-y presten a Fran (2008), L’estranxeru (2009) y La mio hermana ye una mofeta (2011).
L’acta del fallu d’esti gallardón destaca que Vida nel campu ye “una obra noble qu’escuende denuncia pero que nun s’enllena con proclames innecesaries” y na que “el llector participa de los mesmos descubrimientos que los personaxes y dexa la valoración ética pal remate de la llectura”.
Premiu Alfonso Iglesias de Cómic: Alberto Vázquez García, pola obra Los llazos coloraos
Alberto Vázquez García ye un artista gráficu de trayectoria profesional dilatada. Trabayó como dibuxante pal diariu La Nueva España y el mediu dixital asturnews.com, y vien desempeñando un llabor importante como diseñador de murales, cómics y cartelería pa distintes ONX, como Soldepaz-Pachakuti, Médicos Mundi o Secretariado Gitano, ente más otres. Amás, ye autor de dellos trabayos documentales de corte memorialista, ente los que puede destacase 34-35, diez asturianos nel exiliu francés y Poca ropa, la llucha contra la dictadura franquista en Mieres.
Ente les obres presentaes, el xuráu decidió, por unanimidá, conceder el Premiu al cómic tituláu Los llazos coloraos, destacando «la gran ellaboración del guion y el gran trabayu d’investigación que construyen una semeya fiel de la posguerra n’Asturies».
Premiu Nel Amaro de Teatru Profesional: Carlos Alba, Cellero, por Llázaro de Tormes
Carlos Alba, conocíu como Cellero pol nome d’unu de los sos personaxes, tien una trayectoria amplia nel campu de los cuentacuentos y el monologuismu. Los sos espectáculos diríxense a un públicu diversu, anque predomina l’infantil y el xuvenil. Participó como guionista y actor en dellos programes de la TPA, onde pon en práctica’l monologuismu humorísticu asturianu, una disciplina a mediu camín ente la narración y el teatru popular onde’l so personaxe Cellero cunta hestories con humor.
Ente les obres presentaes, el xuráu decidió por mayoría conceder el premiu al espectáculu Llázaro de Tormes, al reconocer nél “la brillosa adaptación d’un clásicu a la cultura asturiana, con un gran percuru llingüísticu tanto nel testu como na representación del espectáculu, entroncando con un xéneru tradicional asturianu como ye’l monólogu, dignificándolo”.
