Énte les informaciones sobro’l cambéu de la área de psiquiatría n’Uviéu, Izquierda Xunida esixe al Gobiernu respeto y que corte de raíz comportamiento intolerables de dirixentes del SESPA, que pa despintar la so propia incapacidá llancen engalimes tratando de parapetarse baxu escudos humanos.
La filtración comenenciuda per parte del serviciu de salú asturianu de que xuna de les persones afectaes pol cambéu ye la muyer de Gaspar Llamazares, solo faise col ánimu avafar la crítica política a lo que ye la voladura per parte de l’Alministración sanitaria del modelu de salú mental.
Tratar de defender los cambeos allegando para desvirtuar les crítiques a parentescos ye un actu de cinismu impresentable que, amás, oculta, nesti casu, un intolerable tufu machista. Verdaderamente, la muyer del voceru d’IX forma parte del personal funcionario de la área de Psiquiatría d’Uviéu, con una acreditada carrera profesional dientro y fora d’Asturies. Amestar les crítiques a parentescos namá denota la fraxilidá de les xustificaciones del SESPA.
Les posiciones polítiques d’Izquierda Xunida d’Asturies nesta materia, y en toes, les marca la mesma organización, atendiendo a la defensa de los sos modelos de xestión pública, ensin condicionamientos personalistes de nengún tipu.
IX d’Asturies llamenta fondamente que’l xerente del SESPA tea respondiendo por lo que más paez xuna purga de funcionarios, bien por allugamientos políticos bien por non baillar l’agua a los sos dirixentes de vez, nuna operación que va suponer la disolución del centru d’atención integral de la Corredoria, que ye indispensable recordar qu’entró en marcha en 2015.
El secretariu d’Organización de IU Asturies, Alejandro Suárez, amosóse especialmente duru con una situación que al so xuiciu, supon xuna contrarreforma del modelu d’atención mental. “La nuesa esmolición va n’aumentu cuando vemos que’l Gobiernu, en cuenta de dialogar pa reordenar un serviciu públicu tan esencial, lo que fai ye intentar, por aciu engalimes, utilizando a funcionaries como escudos humanos, enrocarse, amás con un tufu machista insoportable”.
Suárez señaló que’l conflictu nun guarda relación col futuru d’una o delles persones, “sía o nun sía la muyer de Gaspar Llamazares, que ye xuna funcionaria escelente, sinón lo que ta en xuegu ye la posición política sobro la salú mental”.
El secretariu d’organización acometió contra’l Gobiernu, porque, dixo, “cada vez que tien un problema, en cuenta de solucionalo, xenera dos más y, nesti casu, como dicimos, con un tufu machista realmente cheirientu y que va influyir nes relaciones con Izquierda Xunida”. Nesti sentíu, Alejandro Suárez preguntó si l’Institutu de la Muyer va permanecer ayenu a la situación
Frente al enroque, Alejandro Suárez pidió diálogu y seriedá: “Este ye un Gobiernu que, o camuda d’actitú, o nun vamos poder construyir una pluralidá d’esquierdes. El drama de la esquierda n’Asturies ye que, y demostrar comentarios como los de güei del SESPA, ye qu’hai xuna vieya realidá, que nun acaba de morrer, y hai xuna nueva realidá de la esquierda a la que nun dexen nacer. Y esa ye xuna decisión que tien que tomar el Presidente del Gobiernu”.