La Conceyalía d’Educación y Cultura del Conceyu de Xixón -pente medies de la Oficina de Normalización Llingüística-, nel so enfotu por facer alcordanza de la figura del xesuita y profesor Don Federico González-Fierro Botas y de la so querencia pola nuestra llingua y la so normalización social, convoca la primer edición del “PREMIU FIERRO BOTAS A LA MEYOR IDEA NORMALIZADORA”. Trátase d’agasayar y recordar la figura de Fierro Botas al empar que se venceya cola mocedá a la que tanto quixo y cola que se rellacionó de siguío nos sos años como enseñante.
Esti premiu ta empobináu al alumnáu d’asturianu de Secundaria y Bachilleratu de los centros educativos de Xixón, col envís de favorecer el so protagonismu y la so reflexón ya implicación nel procesu de normalización llingüística. Va premiase’l diseñu d’una campaña normalizadora que desenvuelva una iniciativa orixinal pa favorecer l’usu y la visibilidá del asturianu nel nuestru conceyu. El plazu de presentación d’idees entama’l próximu 4 d’avientu y remata’l 30 d’abril de 2018.