El director xeneral de Política Llingüística y Normalización, Fernando Padilla, presentó n’Avilés la gala del X Premiu al Meyor Cantar, que se va celebrar nel Teatru Palacio Valdés el vienres 29 a les 20:00 hores.
Fernando Padilla, que tuvo acompañáu pola conceyala de Cultura del Conceyu d’Avilés, Yolanda Alonso, y por Montserrat Machicado, miembru del xuráu, destacó l’afitamientu del Premiu nel panorama musical asturianu. «Depués de diez ediciones podemos dicir que yá se convirtió nun referente», señaló Padilla.
Los cuatro finalistes d’esta edición van actuar na gala pa que’l xuráu, formáu por especialistes en música y llingua asturiana, decida’l cantar ganador. Son los grupos Hoboken Band y Luis Núñez y los Folganzanes, amás de los músicos Odón del Paganéu y Bras Rodrigo. Na gala, que se va emitir na TPA, tamién va dar un conciertu Anabel Santiago, ganadora de la edición anterior del Premiu col tema «La lloca».
El Gobiernu del Principáu d’Asturies convoca’l Premiu al Meyor Cantar coles mires de consolidar, prestixar y arriquecer la creación musical n’asturianu y en gallego-asturianu. L’intérprete o grupu ganador va recibir como galardón una escultura orixinal de l’artista María Jesús Rodríguez. Amás, el Gobiernu asturianu va velar pola promoción y espardimientu del cantar nos medios de comunicación y nos eventos entamaos o promovíos por él.