La Conseyería de Fomentu, Ordenación del Territoriu y Mediu Ambiente empecipió güei los trabayos destinaos a rozar los marxes de les carreteres autonómiques qu’escurren polos conceyos de la zona occidental asturiana. Les xeres de llimpieza con un costu de 305.345,24 euros van ser realizaes pola empresa Hordescón S.L. nun plazu máximu de dos meses.
Ta previstu actuar en 740 kilómetros de 43 víes rexonales qu’escurren por 22 conceyos del Principáu d’Asturies: Cuideiru, Salas, Tinéu, Valdés, Boal, Castropol, Coaña, El Franco, Navia, San Martín d’Ozcos, Santalla d’Ozcos, Tapia de Casariego, Taramundi, A Veiga, Vilanova d’Ozcos, Villayón, Cangas, Grandas de Salime, Ayande, Degaña, Pezós y Ibias.
Campaña de roces
Estos trabayos inclúyense dientro de la campaña añal de roces que contrata la Conseyería de Fomentu pa cortar y retirar la maleza que crez nes marxes de les carreteres rexonales, col fin d’ameyorar la seguridá y comodidá nos desplazamientos.
En 2014 salieron a licitación tres contratos con un presupuestu total de 1.272.932,70 euros (IVA incluyíu) colos que se va actuar sobre 2.152,64 kilómetros de 194 carreteres del Principáu d’Asturies asitiaes na práctica totalidá de los conceyos asturianos.
Estos llabores complementen les que lleven a cabu mientres tol añu les brigaes de caltenimientu de la Dirección Xeneral d’Infraestructures y que dexen caltener los 4.198,9 kilómetros de les 470 carreteres qu’integren la rede viaria autonómica.